நெற்செய்கை நிலங்கள் பயன்பெறும வகையிலான வடிச்சல் அபிவிருத்தி வேலைத் திட்டம் துரிதகதியில்

(ஹனீக் அஹமட்)

அம்பாறை மாவட்டத்திலுள்ள சுமார் 08 ஆயிரத்து 500 ஏக்கர் நெற்செய்கை நிலங்கள் பயன்பெறும் வகையில் ஆரம்பிக்கப்பட்டுள்ள வடிச்சல் அபிவிருத்தி வேலைத் திட்டம் துரிதகதியில் இடம்பெற்று வருகின்றது.

மண் அகழும் - மிதக்கும் இயந்திரத்தைப் பயன்படுத்தி மேற்கொள்ளப்படும் இந்த வேலைத் திட்டமானது கடந்த 28 ஆம் திகதி கிழக்கு மாகாண முதலமைச்சர் சிவநேசத்துரை சந்திரகாந்தனினால் ஆரம்பித்து வைக்கப்பட்டது.

மேற்படி மண் அகழும் - மிதக்கும் இயந்திமானது கிழக்கு மாகாண வீதி அபிவிருத்தி, நீர்ப்பாசனம், வீடமைப்பும் நிர்மாணமும், கிராமிய மின்சாரம் மற்றும் நீர்வழங்கல் அமைச்சின் நிதியொதுக்கீட்டின் கீழ் அண்மையில் கொள்வனவு செய்யப்பட்டிருந்தது.

கடந்த பல ஆண்டுகளாக, சம்புக்களப்பு பகுதியிலுள்ள பல்லாயிரக்கணக்கான நெற்காணிகள் - வடிச்சல் வசதிகள் இல்லாத காரணத்தினால் விவசாயம் மேற்கொள்ளப்படாமல் கைவிடப்பட்டுள்ள நிலையிலேயே இந்த வடிச்சல் அபிவிருத்தி வேலைத் திட்டம் மேற்ககொள்ளப்பட்டு வருகின்றது.

சுமார் 100 அடி அகலமும், 08 அடி ஆழமும் கொண்டதாக இந்த வடிச்சல் - கால்வாய் அமைந்துள்ளமை இங்கு குறிப்பிடத்தக்கதாகும்.