அம்பாறையில் வெள்ளம் காரணமாக 30ஆயிரம் ஏக்கர் வயற் காணிகள் பாதிப்பு

 (ஹனீக் அஹமட்)

அண்மையில் ஏற்பட்ட வெள்ளம் காரணமாக அம்பாறை மாவட்டத்தில் சுமார் 30 ஆயிரம் ஏக்கர் நெல் வயற் காணிகள் நீரில் மூழ்கியதாக அம்பாறை மாவட்ட பிரதி விவசாயப் பணிப்பாளர் ஏ.ஆர். அப்துல் லத்தீப் தெரிவித்தார்.

அம்பாறை மாவட்டத்திலுள்ள அட்டாளைச்சேனை, சம்மாந்துறை, தமண மற்றும் அம்பாறை ஆகிய விவசாய வலயங்களிலுள்ள காணிகளே இவ்வாறு வெள்ளத்தினால்; பாதிப்புக்குள்ளாகியதாக அவர் மேலும் தெரிவித்தார்.

அம்பாறை மாவட்டத்தில் இம்முறை பெரும்போகத்தில் 1 லட்சத்து 65 ஆயிரம் ஏக்கர் காணிகளில் நெற் செய்கை மேற்கொள்ளப்பட்டதாகத் தெரிவிக்கப்படுகிறது.

குறிப்பாக, அம்பாறை மாவட்டத்தின் அட்டாளைச்சேனை விவசாய வலயப் பிரதேசங்களில் இம்முறை செய்கை பண்ணப்பட்ட சுமார் 38 ஆயிரம் ஏக்கர் நெல்வயல் காணிகளில் 35 தொடக்கம் 40 வீதமானவை வெள்ளத்தால் பாதிக்கப்பட்டதாக அட்டாளைச்சேனையிலுள்ள உதவி விவசாயப் பணிப்பாளர் காரியாலயத்தின் உத்தியோகத்தர் ஒருவர் கூறினார்.

அட்டாளைச்சேனை விவசாய வலயத்தில் - நிந்தவூர், அட்டாளைச்சேனை, பாலமுனை-ஒலுவில், அக்கரைப்பற்று மேற்கு-ஆலிம்நகர், அக்கரைப்பற்று கிழக்கு, திருக்கோவில், தம்பிலுவில், கோமாரி, பொத்துவில் மற்றும் இறக்காமம் ஆகிய பிரதேசங்கள் அடங்குகின்றன.

மேற்படி பிரதேசங்களிலுள்ள நெற்செய்கைக் காணிகளில் கடந்த ஒக்டோபர் 15 ஆம் திகதிக்கும் நவம்பர் 15 ஆம் திகதிக்கும் இடைப்பட்ட காலங்களில் விதைப்பு நடவடிக்கைகளை மேற்கொள்ளுமாறு விவசாயத் திணைக்கள அதிகாரிகள் விவசாயிகளுக்கு பணிப்புரையினை வங்கியிருந்தனர்.

இந்த நிலையில், கடந்த ஒக்டோபர் 22 ஆம் திகதியிலிருந்து ஒரு வார காலம் பெய்த மழையினால் ஏற்பட்ட வெள்ளம் காரணமாக – அட்டாளைச்சேனை விவசாய வலயத்துக்குட்பட்ட சுமார் 5 வீதமான நெல் வயல்கள் பாதிக்கப்பட்டன.

அதன் பின்னர் இம்மாதம் 22 ஆம் திகதியிலிருந்து பெய்த அடை மழையின் காரணமாக சுமார் 35 முதல் 40 வீதமான நெற் பயிர்கள் மேற்படி விவசாய வலயத்தில் வெள்ளத்தில் மூழ்கின.

வெள்ளத்தில் மூழ்கிய வயல்; காணிகள் சிலவற்றில் தற்போது வெள்ளம் வடிந்துள்ள போதும், சில பகுதிகளிலுள்ள நெல் வயல்கள் தொடர்ந்தும் நீரில் மூழ்கியுள்ளன.

அதேவேளை, வெள்ளத்தில் மூழ்கிய சில காணிகளிலுள்ள நெற்பயிர்கள் அழுகிய நிலையில் காணப்படுகின்றமை குறிப்பிடத்தக்கது.