இலங்கை மின்சார சபைக்கு நாளாந்தம் 167 மில்லியன் ரூபா நஷ்டம்

(கெலும் பண்டார, யொஹான் பெரேரா)

இலங்கை மின்சார சபை கடந்த ஆகஸ்ட் மாதத்திலிருந்து நாளாந்தம் 167 மில்லியன் ரூபா நஷ்டத்தை எதிர்கொண்டு வருவதாக மின்சக்தி, வலுசக்தி  அமைச்சர் சம்பிக்க ரணவக்க  நாடாளுமன்றத்தில் இன்று புதன்கிழமை தெரிவித்தார். மின் உற்பத்திக்கு அனல் சக்தியில் தங்கியிருக்க வேண்டியிருப்பதே இதற்கு காரணம் எனவும் அவர் கூறினார்.  

வறட்சியான காலநிலை காரணமாக, நாட்டின் மின் தேவையில் 80-85 சதவீதத்தை உற்பத்தி செய்வதற்கு அனல் சக்தியிலேயே தங்கியிருக்க வேண்டியுள்ளதாகவும் அவர் கூறினார்.

தற்போதைய சாதகமற்ற காலநிலை தொடர்ந்தால் இலங்கை மின்சார சபையை இயக்குவது கடினமாகிவிடும் எனவும் அவர் தெரிவித்தார்.

ஐ.தே.க. நாடாளுமன்ற உறுப்பினர் ரவி கருணாநாயக்க எழுப்பிய கேள்வியொன்றுக்கு பதிலளிக்கையிலேயே அமைச்சர் சம்பிக்க ரணவக்க இத்தகவல்களை தெரிவித்தார்.

சாதாரண நிலைமையில் 48 சதவீத மின்சாரம் அனல் சக்தி மூலமும், 47 சதவீதம் நீர் வலு மூலமும் எஞ்சியவை காற்று மற்றும் ஏனைய சக்திமூலங்கள் ஊடாகவும் உற்பத்தி செய்யப்படுகின்றன.