பி.எச்.டி. பட்டதாரிகளுக்கு தட்டுப்பாடு

இலங்கைப் பல்கலைக்கழகங்களில் கல்வி கற்பிக்கும் அதிகாரிகளில் 60 சதவீதமானோர் பி.எச்.டி. (கலாநிதி) தகைமையை கொண்டிருக்கவில்லை என உயர்கல்வி அமைச்சர் எஸ்.பி.திசாநாயக்க தெரிவித்துள்ளார்.

பட்டப்பின்படிப்பு கல்விநிறுவகத்தில் நடைபெற்ற வைபவமொன்றில் கலந்துகொண்டு உரையாற்றுகையிலேயே அமைச்சர் இவ்வாறு கூறியுள்ளார்.

வடக்கு கிழக்கிலுள்ள பல்கலைக்கழகங்களிலும் புதிதாக ஆரம்பிக்கப்பட்ட பல்கலைக்கழகங்களிலும் இந்நிலைமை மோசமாக இருப்பதாக அவர் தெரிவித்தள்ளார்.

முகாமைத்துவம் தகவல்தொழில்நுட்பம் போன்ற துறைகளில் பட்டப்பின்படிப்பு தகைமை பெற்ற பல்கலைக்கழக ஆசிரியர்களுக்கு பற்றாக்குறை ஏற்பட்டுள்ளதாகவும் அமைச்சர் கூறினார்.

கலை, மனிதவியல், முகாமைத்துவம் போன்ற துறைகளைச் சார்ந்த பல்கலைக்கழக ஆசிரியர்கள் வெளிநாட்டுப் பல்கலைக்கழகங்களில் கற்பதற்கு குறைந்த நிதிவளத்தையே கொண்டிருக்கின்றனர். எனவே ஒருவருட கால ஆய்வுகளை மாத்திரம் வெளிநாட்டுப் பல்கலைக்கழகங்களில் மேற்கொள்வோருக்கு உள்நாட்டுப் பல்கலைக்கழகங்களில் பி.எச்.டி பட்டத்தை வழங்கக் கோருவது சிறந்தது எனவும் அவர் தெரிவித்தார்.

இத்திட்டம் அடுத்த வருடம் முதல் அமுல்படுத்தப்படும் என் கூறிய அமைச்சர் இதை வெற்றிகரமாக்குவதற்கு பல்கலைக்கழகங்களின் சிரேஷ்ட அதிகாரிகளின் ஒத்துழைப்பை எதிர்பார்ப்பதாகவும் அவர் கூறினார்.