கொலை செய்யப்பட்ட பொலிஸுக்கு பதவி உயர்வு

தேரரொருவரால் கழுத்து நெரித்துக் கொலை செய்யப்பட்ட பொலிஸ் சார்ஜன்ட் தர உத்தியோகத்தருக்கு, உப பொலிஸ் பரிசோதகராகப் பதவி உயர்வு வழங்கப்பட்டுள்ளதாக, பொலிஸ் தலைமையகம் தெரிவித்துள்ளது.

பொலிஸ் மா அதிபர் பூஜித் ஜயசுந்தரவின் பணிப்பின் போரில், இந்தப் பதவி உயர்வு வழங்கப்பட்டுள்ளது.

இரத்தினபுரி - கல்லெந்த விகாரைக்கு, விசாரணைக்காகச் சென்ற நிலையில், நேற்று முன்தினம் குறித்த பொலிஸ் உத்தியோகத்தர், கொலை செய்யப்பட்டிருந்தார்.

இரத்தினபுரி பொலிஸ் நிலையத்தின் சிறு முறைப்பாட்டுப் பிரிவைச் சேர்ந்த அதிகாரியொருவரே, இவ்வாறு கொலை செய்யப்பட்டிருந்தார்.

இதேவேளை, ​கொலை செய்த குற்றச்சாட்டில் கைதுசெய்யப்பட்ட தேரரை, எதிர்வரும் 25ஆம் திகதி வரையில் விளக்கமறியலில் வைக்குமாறு, இரத்தினபுரி நீதவான் நீதிமன்றம், நேற்று (11)  உத்தரவு பிறப்பித்தது.