வெளிநாட்டு நாணயத்தாள்களை கடத்த முயன்றவர் கைது

ஒரு கோடியே 9 இலட்சத்துக்கு 17 ஆயிரத்து 496 ரூபாய் பெறுமதியான வெளிநாட்டு நாணயத்தாள்களை, சட்டவிரோதமான முறையில் சிங்கபூருக்கு கடத்துவதற்கு முயன்ற இலங்கைப் பிரஜையொருவர் கைதுசெய்யப்பட்டுள்ளார்.

நீர்கொ​ழும்பை வசிப்பிடமாகக் கொண்ட 58 வயதான ஒருவரே இவ்வாறு கைதுசெய்யப்பட்டுள்ளார். அவர், கட்டுநாயக்க பண்டாரநாயக்க சர்வதேச விமான நிலையத்திலிருந்து சிங்கபூருக்கு பயணமாகவிருந்தார்.

இன்று (09) அதிகாலை 3:30க்கு சிங்கபூரை நோக்கி பயணிக்கவிருந்த, சிங்கபூர் விமானச் சேவைக்குச் சொந்தமான எஸ்.கியூ-469 என்ற விமானத்திலேயே ​அவர் பயணிக்கவிருந்தார்.

யூரோ-50,000, ஐக்கிய மெரிக்க டொலர் 5,000 மற்றும் சிங்கபூர் டொலர் 149 ஆகியனவற்றையே, தன்னுடைய பயணப்பொதியில், செய்திதாள்களினால் மறைத்துவைத்து, எடுத்துச் செல்வதற்கு அவர் முயன்றார் என்று தெரிவித்த விமான நிலையத்தின் சுங்கப்பிரிவினர், அவரிடம் மேலதிக விசாரணைகளை மேற்கொண்டுவருவதாகவும் தெரிவித்தனர்.