இளைஞர் நாடாளுமன்றத்துக்கு பிரதி அமைச்சர்கள் தெரிவு

நாடாளாவிய ரீதியில் நடைபெற்ற இளைஞர் நாடாளுமன்றத் தேர்தலில், பசறை பிரதேச செயலாளர் பிரிவில் போட்டியிட்டு வெற்றிபெற்ற பசறை தமிழ் தேசிய பாடசாலையின் உயர்தர வகுப்பு மாணவி யோகேஸ்வரன் யதுர்ஷிக்கா, இளைஞர் நாடாளுமன்றத்தின் அமைச்சுப் பதவிகளுக்காக இடம்பெற்ற நேர்முகத் தேர்வில் சித்திபெற்று வலு சக்தி பிரதியமைச்சராக நியமனம் பெற்றுள்ளார்.

இப்பதவிக்கு தெரிவு செய்யப்பட்ட இவரை, பாடசாலை அதிபர் உட்பட பாடசாலை சமூகம் வாழ்த்தி பாராட்டி மகிழ்கின்றது.       

இதேவேளை, லுணுகலை பிரதேச செயலாளர் பிரிவில் போட்டியிட்டு இளைஞர் நாடாளுமன்றத்துக்குத் தெரிவான செல்வன் இரம்மியன், ஆளுந் தரப்பு அமைப்பாளராகவும் உள்நாட்டு வர்த்தக மற்றும் நுகர்வோர் உரிமைகளுக்கான பிரதியமைச்சராகவும் தெரிவாகியுள்ளார்.

இவருக்கு லுணுகலை பிரதேச இளைஞர் கழகங்கள் வாழ்த்து தெரிவித்துள்ளன.