நுரைச்சோலை அனல்மின் நிலையத்தில் தீ

(ஹிரான் பிரியங்கர ஜயசிங்க)

நுரைச்சோலை அனல்மின் நிலையத்தில் இன்று அதிகாலை பாரிய தீவிபத்துச் சம்பவமொன்று இடம்பெற்றுள்ளது. இன்று அதிகாலை 3 மணியளவில் இடம்பெற்ற இத்தீவிபத்தினை கட்டுப்பாட்டுக்குள் கொண்டுவருவதற்காக தீயணைப்புப் படையினர் தீவிர முயற்சியில் ஈடுபட்டு வருகின்றனர்.

கடலிலிருந்து அனல்மின் நிலையத்திற்கு கரித்துண்டுகளை எடுத்துச்செல்லும் குழாயிலேயே மேற்படி தீவிபத்து ஏற்பட்டுள்ளது. இவ்விபத்துச் சம்பவத்தினால் எவருக்கும் இதுவரை எவ்வித ஆபத்தும் ஏற்படவில்லை எனவும், அனல்மின் நிலையத்தின் சேதவிபரங்களை தற்சமயம் கூறமுடியாதுள்ளதாகவும் பொலிஸார் தெரிவிக்கின்றனர்.

இதேவேளை நுரைச்சோலை அனல்மின் நிலையத்தின் மின் உற்பத்திகள் அனைத்தும் தற்சமயம் தற்காலிகமாக இடைநிறுத்தப்பட்டுள்ளதாகவும் சில மணிநேரத்தில் நிலைமை வழமைக்கு திரம்பிவிடும் எனவும் இலங்கை மின்சாரசபை தெரிவித்துள்ளமை குறிப்பிடத்தக்கது.