காலிறுதியில் ஹலெப்

இடம்பெற்றுவரும் பிரெஞ்சுப் பகிரங்க டென்னிஸ் தொடரில், இன்று இடம்பெற்ற தனது நான்காவது சுற்றுப் போட்டியில் வென்ற உலகின் முதல்நிலை வீராங்கனையான சிமோனா ஹலெப், காலிறுதிப் போட்டிக்குத் தகுதிபெற்றார்.

சிமோனா ஹலெப், 6-2, 6-1 என்ற நேர் செட்களில் பெல்ஜியத்தின் எலிஸே மேர்ட்டன்ஸை வென்றார்.

இதேவேளை, உலகின் இரண்டாம் நிலை வீராங்கனையான டென்மார்க்கின் கரோலின் வொஸ்னியாக்கி, நேற்று ஆரம்பித்து போதிய வெளிச்சமின்மை காரணமாக இன்று வரை தொடர்ந்த தனது நான்காவது சுற்றுப் போட்டியில், 6-7 (5-7), 3-6 என்ற நேர் செட்களில் ரஷ்யாவின் டரியா கஸட்கினாவிடம் தோல்வியடைந்து தொடரிலிருந்து வெளியேறினார்.

இந்நிலையில், நேற்று  இடம்பெற்ற நான்காவது சுற்றுப் போட்டிகளில், உலகின் மூன்றாம் நிலை வீரரான ஜேர்மனியின் அலெக்ஸான்டர் ஸவ்ரேவ், 4-6, 7-6 (7-4), 2-6, 6-3, 6-3 என்ற செட் கணக்கில் ரஷ்யாவின் கரென் காச்சனோவை வென்றும் உலகின் எட்டாம் நிலை வீரரான ஒஸ்திரியாவின் டொமினிக் தெய்ம், 6-2, 6-0, 5-7, 6-4 என்ற செட் கணக்கில் ஜப்பானின் கீ நிஷிகோரியை வென்றும் 12 தடவைகள் கிரான்ட் ஸ்லாம் பட்டங்களை வென்ற சேர்பியாவின் நொவக் ஜோக்கோவிச், 6-3, 6-4, 6-2 என்ற நேர் செட்களில் ஸ்பெய்னின் பெர்ணான்டோ வெர்டாஸ்கோவை வென்றும் காலிறுதிப் போட்டிகளுக்கு முன்னேறினர்.

இதேவேளை, உலகின் ஒன்பதாம் நிலை வீரரான பெல்ஜியத்தின் டேவிட் கொபின், தனது நான்காவது சுற்றுப் போட்டியில் 5-7, 6-4, 0-6, 3-6 என்ற செட் கணக்கில் இத்தாலியின் மார்கோ செக்சினாட்டோவிடம் நேற்று தோல்வியுற்று தொடரிலிருந்து வெளியேறினார்.


காலிறுதியில் ஹலெப்

அன்புள்ள வாசகர்களே,

நீங்கள் தெரிவிக்கும் கருத்துகளுக்கு நிர்வாகம் எவ்விதத்திலும் பொறுப்பாகாது. அவை உங்களின் தனிப்பட்ட கருத்துகளாகும். உங்களின் கருத்துகள் ஆசிரியரின் தகுந்த தணிக்கைக்குப் பிறகே பதிவேற்றம் செய்யப்படும் என்பதைக் கவனத்திற்கொள்க. உங்கள் யோசனைகளையும் எங்களுக்கு அனுப்புங்கள். .
 
All the content on this website is copyright protected and can be reproduced only by giving the due courtesy to 'www.tamilmirror.lk' Copyright © 2012 Wijeya Newspapers Ltd.