கால்பந்தாட்ட போட்டியில் புத்தளம் பிராந்திய குழு சம்பியன்

-எம்.யூ.எம்.சனூன்

இலங்கை கால்ப்பந்தாட்ட சம்மேளனத்தினால் நடத்தப்பட்டுவரும் எப்.ஏ.கிண்ணத்துக்கான கால்ப்பந்தாட்ட தொடரில், புத்தளம் பிராந்திய குழு சம்பியனாகியுள்ளதுடன்   புத்தளம் லிவர்பூல் அணி பிராந்திய சம்பியனாகியுள்ளது.  

புத்தளம் நகரின் மிகப்பழைமையானதும் மிகப்பலம் வாய்ந்த அணியுமான திரி ஸ்டார்ஸ் அணியை  எப்.ஏ.கிண்ணத்துக்கான கால்ப்பந்தாட்ட தொடரின் மூன்றாம் சுற்றான குழு சம்பியனுக்கான போட்டியில் வீழ்த்தியதன் மூலம் லிவர்பூல் அணி இந்த சாதனையை நிலை நாட்டியுள்ளது.

இந்த பரபரப்பான இறுதிப் போட்டியானது புத்தளம் சாஹிரா தேசிய கல்லூரி மைதானத்தில் வியாழக்கிழமை (11) மாலை நடைபெற்றது. இந்த ஆட்டத்தில் பங்கேற்கும் இரு அணிகளுமே பலம் வாய்ந்த அணிகள் என்பதால் போட்டி விறுவிறுப்பாக அமையும் என எதிர்பார்த்து புத்தளம் சாஹிரா கல்லூரி மைதானம் ரசிகர்களால் நிரம்பி வழிந்தது.

இடைவேளைக்கு முன்பாக இரு அணிகளும்  ஒவ்வொரு கோலை பெற்றிருந்தன. இடைவேளைக்கு பின்னர் திரி ஸ்டார்ஸ் அணி மற்றுமொரு கோலை பெற்றுகொண்டதால் அதனை தொடர்ந்து த்ரீ ஸ்டார்ஸ் அணி மைதானத்தில் ஆதிக்கம் செலுத்தியது. எனினும் பலத்த போராட்டங்களின் பின்னர் லிவர்பூல் அணியினர், போட்டியின் முடிவில் கோல் போடும் தமது வழமையான பாணியில் மற்றுமொரு கோலை செலுத்தியதால் போட்டி மேலும் பலமானது.

போட்டி நிறைவடையும்போது இரு அணிகளுமே தலா இரு கோல்களை பெற்று, போட்டி சமநிலையில் காணப்பட்டதால் பிரதம நடுவர் தண்ட  உதைக்கு அழைப்பு விடுத்தார். தண்ட உதையில் லிவர்பூல் அணியானது 4:2 கோல்களினால் வெற்றி பெற்றது.

லிவர்பூல் அணிக்காக  எம்.முசக்கீர் மற்றும் எச்.எச்.ஹம்ருசைன் ஆகியோரும் த்ரீ ஸ்டார்ஸ் அணிக்காக ஏ.சபீக் மற்றும் எம்.அஸ்ரான் ஆகியோரும் கோல்களை பெற்றுக்கொடுத்தனர்.

போட்டியின் நடுவர்களாக எம்.எஸ்.எம்.ஜிப்ரி, எம்.ஆர்.எம்.அம்ஜத், ஏ.எம்.பஸ்ரின் ஆகியோர் கடமையாற்றினர்.