கொரியாவில் போரேற்பட அனுமதியோம்'

கொரியத் தீபகற்பத்தில் போரேற்படுவதற்கோ அல்லது குழப்பங்கள் ஏற்படுவதற்கோ அனுமதிக்கப் போவதில்லையென, சீன ஜனாதிபதி ஸி ஜின்பிங் தெரிவித்துள்ளார். அவ்வாறான நிலைமையொன்று, எவருக்கும் அனுகூலமாக அமையாது என அவர் தெரிவித்துள்ளார்.

அணுவாயுதங்கள் தொடர்பான வடகொரியாவின் முயற்சிகளும் அந்நாட்டின் அண்மைக்கால ஏவுகணைச் சோதனைகளும், பிராந்தியத்தில் குழப்பநிலையை ஏற்படுத்தியுள்ளன. குறிப்பாக, தென்கொரியா மீது தாக்குதல் நடத்தப்படுமா என்ற அச்சம் காணப்படுகிறது. அவ்வாறான எச்சரிக்கைகளை, வடகொரியாவும் விடுத்துவருகிறது.

உலகில், வடகொரியாவுடன் ஓரளவு அனுசரணையாகச் செயற்படும் ஒருசில நாடுகளில், சீனாவும் ஒன்றெனக் கருதப்படுகிறது. வடகொரியாவுடன் வர்த்தகத் தொடர்புகளையும் சீனா பேணிவருகிறது. எனினும், வடகொரியாவின் அணுசக்தி முயற்சிகளை, சீனா ஆதரிக்கவில்லை.

இந்நிலையிலேயே கருத்துத் தெரிவித்துள்ள சீன ஜனாதிபதி, 'தீபகற்பத்தின் நெருங்கிய அயலவர் என்ற அடிப்படையில், போரையோ அல்லது குழப்பத்தையோ நாம் அனுமதிக்க மாட்டோம். அவ்வாறான நிலைமையொன்று, எவருக்கும் அனுகூலமாக அமையாது" எனத் தெரிவித்தார்.