‘எம்.பிக்களுக்கு இரட்டை மொழி தேர்ச்சி கட்டாயம்’

“நாடாளுமன்றத்துக்குத் தெரிவாகியுள்ள அனைத்து உறுப்பினர்களுக்கும், இரட்டை மொழித் தேர்ச்சி இருக்க வேண்டும்” என, தேசிய சகவாழ்வு மற்றும் தேசிய அரசகரும மொழிகள் அமைச்சர்  மனோ கணேசன் தெரிவித்தார்.  

கொழும்பு பண்டாரநாயக்கா சர்வதேச மாநாட்டு மண்டபத்தில், நேற்று இடம்பெற்ற, தேசிய சமய மாநாட்டில் கலந்துகொண்டு உரையாற்றும் போதே, அவர் மேற்கண்டவாறு தெரிவித்தார்.  

அங்கு தொடர்ந்து உரையாற்றிய அவர், “இரட்டை மொழிகளிலும் தேர்ச்சியற்ற அமைச்சர்கள், நாடாளுமன்ற உறுப்பினர்களால், வடக்கு மற்றும் தெற்கிலுள்ள மக்களின் பிரச்சினைகளைப் புரிந்துகொள்ளவோ அல்லது அப்பிரச்சினைகளுக்குத் தீர்வு பெற்றுக்கொடுக்கவோ முடியாது. அதனால், அவர்களுக்கு இரட்டை மொழித் தேர்ச்சியைக் கட்டாயப்படுத்தும் சட்டம் அமுல்படுத்தப்படல் வேண்டும்” என்றார்.