கர்ப்பிணி கொலை : சந்தேக நபர்கள் அடையாளம் காணப்பட்டனர்

எம்.றொசாந்த்

ஊர்காவற்றுறை கரம்பன் பகுதியில் 7 மாத கர்ப்பிணி பெண் ஒருவர் கூரிய ஆயுதத்தால் தாக்கப்பட்டு உயிரிழந்த சம்பவம் தொடர்பில் அடையாள அணிவகுப்பு ஊர்காவற்றுறை நீதிவான் நீதிமன்ற நீதிவான் ஏ.எம்.எம்.றியால் முன்னிலையில் இன்று (22) இடம்பெற்றது.

இதன்போது, குறித்த வழக்கில் கண்கண்ட சாட்சியாகவுள்ள மாற்றுத்திறனாளியான 12 வயது சிறுவன், மன்றில் சந்தேகநபர்கள் இருவரையும் அடையாளம் காட்டினான்.

இதனையடுத்து, மரபணு பரிசோதனைக்காக, குறித்த நபர்களின் இரத்த மாதிரிகளை, நாளை வியாழக்கிழமை (23) பெற்றுக்கொள்வதற்கு சட்ட வைத்திய அதிகாரிக்கு உத்தரவிட்ட நீதவான், சந்தேகநபர்கள் இருவரையும் எதிர்வரும் 27ஆம் திகதி வரை விளக்கமறியலில் வைக்க உத்தரவிட்டார்.

ஊர்காவற்றுறை கரம்பன் பகுதியில் 7 மாத கர்ப்பிணியும் 4 வயது சிறுவன் ஒருவரின் தாயான ஞானசேகரம் ஹம்சிகா (வயது 25) என்பவர் கடந்த ஜனவரி மாதம் 24 ஆம் திகதி கூரிய ஆயுதத்தால் தாக்கப்பட்டு உயிரிழந்தார். இவருடைய கொலை தொடர்பில், மண்டைதீவு பகுதியில் வைத்து முச்சக்கரவண்டியில் சென்ற இருவர் அதே தினத்தில் கைது செய்யப்பட்டு விளக்கமறியலில் வைக்கப்பட்டுள்ளனர்.