DEVELOPING STORY

‘ஊசியை வைத்தே அம்மாவின் சடலத்தை கண்டேன்’

ஆலயத்துக்கு சென்ற எனது அம்மாவும் இறந்துவிட்டாரென மாமா சொன்னார். அம்மா​ சென்றிருந்த ஆ​லையத்து ஓடோடிச் சென்றேன். ஆனால், காவலில் நின்றிருந்தவர்கள், உள்ளே செல்வதற்கு என்னை அனுமதிக்கவில்லை என சாட்சியமளித்த ஒரு தாயின் மகன், அம்மாவின் கொண்டை ஊசி மற்றும் வௌ்ளை நிறத்திலான தோடு ஆகியவற்றை வைத்தே, அம்மாவின் சடலத்தை அடையாளம் கண்டேன் என, கண்ணீர் மல்க, சாட்சியளமளித்தார்.

கொச்சிக்கடை புனித அந்தோனியார் தேவாலய குண்டு வெடிப்பு சம்பவத்தில் உயிரிழந்தவர்களின் மரண விசாரணை, கொழும்பு பிரதான நீதவான் லங்கா ஜயரத்ன, நேற்று (23) இடம்பெற்றது. விசாரணையை, பொலிஸார் நெறிப்படுத்தினார். நேற்றைய மரண விசாரணையின் போது, மூன்று பேர் சாட்சியமளித்தனர்.

கொச்சிக்கடை புனித அந்தோனியார் தேவாலய குண்டு வெடிப்பு சம்பவத்தில் உயிரிழந்த வேலாயுதம் வேலுசாமி சரோஜினி மற்றும் ஹோய் பெனடிக் ஜயராஜ் ஆகியோரின் மரண விசாரணைகளே நேற்று இடம்பெற்றன.

சரோஜினியின் மகன்

வேலாயுதம் வேலுசாமி சரோஜினியின் மரண விசாரணையில் அவருடைய மகனான மொஹமட் ஜபாய் மொஹமட் சஹர் சாட்சியமளிக்கையிலேயே தன்னுடைய தாய் அணிந்துசென்றிருந்த கொண்டை ஊசி, வௌ்ளை நிறத்திலான தோடு ஆகியவற்றை வைத்தே தாயின் சடலத்தை அடையாளம் கண்டதாக தெரிவித்தார்.

“எனது பெயர் மொஹமட் ஜபாய் மொஹமட் சஹர். வயது 30, நான் கூலி வேலை செய்து வருகின்றேன். கொட்டாஞ்சானையை வசிப்பிடமாகக் கொண்டுள்ளேன்” என்றார்.

குண்டு வெடிப்பு சம்பவம் இடம்பெற்ற​ தினத்தன்று, நான் வேலையில் இருந்தேன். நான் வேலைக்கு போக முன்னர் எனது அம்மா, “தான் பள்ளிக்கு போக போகிறேன். நீயும் வருகிறாயா?” என்று கேட்டார். இதற்கு நான், “எனக்கு வேலை இருக்கிறது. நீங்கள் போய் வாருங்கள். என் பிறகு வருகிறேன்” என்றேன்.

அதற்கு அம்மா, “நான் போகிறேன். நீ பிறகு வா” எனக் கூறிவிட்டு அவர் பள்ளிக்குச் சென்று விட்டார்.

நானும் அம்மாவை வழியனுப்பிவைத்துவிட்டு வேலைக்குச் சென்றுவிட்டேன் என்றார்.

இதையடுத்து, கேள்வியெழுப்பிள நீதவான், குண்டு வெடிப்பு சம்பவத்தை நீங்கள் எவ்வாறு அறிந்தீர்கள் என வினவினார்.

அதற்கு பதிலளித்த அவர், எனது மாமாவின் மூலம் சம்பவத்தை அறிந்து கொண்டேன் என்றார்.

இதையடுத்து, கேள்வியெழுப்பிய நீதவான், சம்பத்தை அறிந்ததும், நீங்கள் சம்பவ இடத்துக்கு (தேவாலயத்துக்கு) சென்றீர்களா என வினவினார்.

இதற்கு பதிலளித்த அவர், நான் அங்கு போகவில்லை. என்னை அங்கு போவதற்கு அனுமதியளிக்கவில்லையெனத் தெரிவித்தார்.

இறந்தது உங்கள் அம்மா என்பதை எவ்வாறு உறுதி செய்தீர்கள் என நீதவான் வினவியதற்கு பதிலளித்த அவர், “எனது அம்மா சம்பவம் நடந்த மாதத்துக்கு ஒரு மாதத்துக்கு முன்னர் இந்தியாவுக்குச் சென்றிருந்தார். இந்தியாவில் இருந்து அலங்கைக்கு வந்த அவர், சிலர் பொருள்னை கொள்வனவு செய்திருந்தார். அதில் கொண்டை ஊசியும் உள்ளடங்கியிருந்தது.

“இந்தகொண்டை ஊசியை​, வெடிப்பு சம்பவம் இடம்பெற்ற தினத்தில் தேவாலயத்துக்கு அணிந்து சென்றிருந்தார்.

வெடிப்பு சம்பவம் இடம்பெற்றதை கேள்வியுற்ற என்னை அவ்விடத்துக்கு செல்ல என்னுடன் இருந்தவர்கள் அனுமதிக்கவில்லை. பின்னர், வைத்தியசாலைகளில் உள்ள பிரேத அறையில் சடலங்கள் வைக்கப்பட்டுள்ளதை அறிந்து கொழும்பு வைத்தியசாலையின் பிரேத அறைக்குச் சென்றேன்.

“அங்கு எனது அம்மாவின் சடலம் காட்டப்பட்டது. அதன்போது, உடற்பாகங்கள் அனைத்தும் சிதைவடைந்த நிலையில் அடையாளம் காண முடியாதவாறு இருந்து.

“பின்னர், எனது அம்மாவின் தலை மயிரில் செருகியிருந்த கொண்டை ஊசியை வைத்து, இது தான் எனது அம்மாவின் சடலம் என அடையாளம் கண்டுகொண்டேன். அந்த கொண்டை ஊசி நெழிந்த நிலையில் காணப்பட்டது.

அத்துடன், எனது அம்மா வழமையாக அணியும் வௌ்ளைத் தோடொன்று உள்ளது. அந்தத் தோடையே, அன்றையதினம் அணிந்திருந்தார்.

அந்தத் தோட்டையும், கொண்டை ஊசியையும் வைத்தே, எனது அம்மாவின் சடலத்தை அடையாளம் காட்டினேன்” என்றார்.

இதையடுத்து, கேள்வியெழுப்பிய நீதவான், சடலத்தை அடையாளம் காட்டியவுடன், மரபணு பரிசோதனைக்கு குருதி வழங்கினீர்களா?

இதற்கு பதிலளித்த அவர், “ஆம், வழங்கிய தினம் சரியாக ஞாபகம் இல்லை. பத்தரமுல்லைக்குச் சென்றே மரபணு பரிசோதனைக்கான எனது குருதியை கொடுத்தேன். எனது கட்டை விரலில் இருந்து இரத்தம் பெறப்பட்டது” என்றார்.

இவ்வாறு பெறப்பட்ட இரத்தம், உங்களுடைய அம்மாவின் மரபணு பரிசோதனை அறிக்கையுடன் ஒத்துபோனதா என நீதவான் வினவியதற்கு, அவர், “ஆம்” என பதிலளித்தார்.

மீண்டும் இதை உறுதிப் படுத்துவதற்காக கேள்வியெழுப்பிய நீதவான், “மரபணு பரிசோதனை அறிக்கையை வைத்துதான், உங்களுடைய அம்மாவின் மரணத்தை உறுதி செய்கிறீர்களா?” என வினவினார்.

அதற்கு பதிலளித்த அவர், ஆம். அத்துடன், எனது அம்மா அன்றைய தினம் அணிந்திருந்த கொண்டை ஊசி, தோடு ஆகியவற்றையும் வைத்தே, அது எனது அம்மாவின் சடலம் என உறுதி செய்தேன் என மன்றுரைத்தார்.

“உங்களுடைய அம்மாவின் சடத்தை பெறுப்பேற்றீர்களா?” என நீதவான் வினவியதற்கு அவர், “ஆம்” என பதிலளித்தார்.

இறுதியாக, வேறு விடயங்கள் எவற்றையாவது மன்றில் முன்வைக்க விரும்புகிறீர்களா என வினவியதற்கு, அவர், “இல்லை” எனத் தெரிவித்து, தனது சாட்சியப் பதிவை நிறைவுசெய்தார்.

சரோஜினியின் அண்ணன் வேலுசாமி ராஜரட்ணம்:

இதையடுத்து, சரோஜினியின் மரண விசாரணை தொடர்பில் சாட்சியமளித்த அவரது அண்ணன் வேலுசாமி ராஜரட்ணம்,

எனது பெயர் வேலுசாமி ராஜரட்ணம். வயது 50. நான் ஒரு வியாபாரி. நான் கொட்டாஞ்சேனை – பிக்கரிங்ஸ் வீதியில் வசித்துவருகிறேன். உயிரிழந்தவர், எனது சகோதரியாவர்.

சம்பவம் நடந்த தினத்தில் நான் என்னுடைய வீட்டில் இருந்தேன். அப்போது கொச்சிகடை தேவாலயத்தில் குண்டு வெடிப்பு சம்பவம் இடம்பெற்றதை நான் அறிந்திக்கவில்லை. வெடிப்பு சம்பவம் இடம்பெற்று சில நிமிடங்களில் எனது அக்கா அலைபேசி ஊடாக அழைப்பை ஏற்படுத்தி, கொச்சிகடை தேவாலயத்தில் குண்டு வெடித்ததை கூறினார்.

அத்துடன், தேவாலயத்துக்கு தங்கையும் சென்றிருந்ததாக, அக்கா கூறினார்.

“இதையடுத்து, பதறிக்கொண்டு நான் தேவாலயத்துக்குச் சென்ற போது, அங்கு அனைத்தும் நடந்தேறி முடிந்துவிட்டது. கொச்சிக்கடை தேவாலயத்தை சூழ பொலிஸாரும் இராணுவத்தினரும் சூழ்ந்திருந்தார். இதையடுத்து, நான் தேவாலயத்தை நெருங்கும் போது, அங்கிருந்த பொலிஸாரும் இராணுவத்தினரும், என்னை தேவாலயத்துக்குள் செல்லவோ, தேவாலயத்தை நெருங்கவோ அனுமதிக்கவில்லை.

இருந்தும், அங்கிருந்த பொலிஸாரிடம், ”எனது தங்கை தேவாலயத்துக்கு வந்திருந்தார். அவரது நிலைமை என்னவென்று பார்க்க வேண்டும்” என கேட்டேன்.

அதற்கு மறுப்புத் தெரிவித்த பொலிஸார், “சடலங்கள் அனைத்தும் கொழும்பு வைத்தியசாலை, களுபோவில வைத்தியசாலைகளுக்குக் கொண்டு செல்லப்படும். அங்கு சென்று உங்களது தங்கை உயிரிழந்திருக்கிறாரா என்பதை உறுதிப்படுத்திகொள்ளுங்கள்” எனத் தெரிவித்தனர்.

இதையடுத்து, மருமகனுடன் (உயிரிழந்தவரின் மகன்) கொழும்பு வைத்தியசாலைக்குச் சென்றேன் என்றார்.

அதைத்தொடர்ந்து கேள்வியெழுப்பிய பொலிஸார், உயிரிழந்தவரின் சடலத்தை தேடினீர்களா, அதன் பின்னர் அடையாளம் கண்டீர்களா என வினவினர்.

இதற்கு பதிலளித்த அவர், ஆம். கொச்சிக்கடை தேவாலயத்துக் வௌியே கண நேரம் நின்றேன். பின்னர் அஙிகிருந்த பொலிஸாரின் அறிவுறுத்தலுக்கமைய, நானும் எனது மருமகனும் கொழும்பு வைத்தியசாலையின் பிரேத அறைக்குச் சென்று பார்த்தோம்.

பிரேத அறையில் வைத்து எனது தங்கையின் சடலத்தை என்னால் சரியாக அடையாளம் காணமுடியவில்லை, அந்த அளவுக்கு எனது தங்கையின் உடல் சிதைவடைந்து இருந்தது எனத் தெரிவித்தார்.

அதன் பின்னர் எவ்வாறு அடையாளம் காட்டினீர்கள் என நீதவான் கேள்வியெழுப்பியதற்கு பதிலளித்த அவர்,

இறுதி வரையில் என்னால் சடலத்தை அடையாளம் காணமுடியவில்லை. இறுதியில், அவர் வழமையாக கழுத்தில் அணியும் சங்கிலி, கொண்டை ஊசி, வௌ்ளை நிறத்தோடு என்பவற்றை வைத்தே, அது எனது தங்கையின் சடலம் என அடையாளம் கண்டேன்.

அத்துடன், எனது அக்கா வழங்கிய தகவலுக்கமைய, அன்றைய தினம் எனது தங்கை ரோஸ் நிற ஆடையை அணிந்து சென்றதாகத் தெரிவித்தார்.

அந்த ஆடையின் சிறிய துண்டொன்றும் சடத்தில் ஒட்டியிருந்தது. அதை வைத்துமே, எனது தங்கையின் சடலம் என அடையாளம் கண்டேன்.

இருப்பினும், அது எனது தங்கையின் சடலம் தான் என உறுதியாக அடையாளம் காட்டமுடியாத நிலையில் இருந்தேன் என்றார்.

இதையடுத்து, கேள்வியெழுப்பிய அவர், நீங்கள் மரபண பரிசோதனைக்கு குருதி வழங்கினீர்களா?

அதற்கு பதிலளித்த அவர், என்னிடம் குருதி பெறப்படவில்லை. ஆனால், எனது மருமகனிடம் குருதி பெறப்பட்டது. மரபணு பரிசோதனை வந்ததன் பின்னரே, எதையும் கூற முடியும் என, அங்கிருந்த அதிகாரிகள் தெரிவித்தனர்.

பிரேத அறைக்கு யார் முதலில் சென்றது? அங்கு யார், யார் இருந்தார்கள் என நீதவான் வினவியதற்கு பதிலளித்த அவர், நான் தான் முதலில் பிரேத அறைக்குள் சென்றேன். அங்கு மரண விசாரணை அதிகாரிகள் இருந்தனர். நான் பாரத்த பின்னர் எனது மருமகன் சென்று சடலத்தை பார்வையிட்டார் என்றார்.

மரபணு பரிசோதனை அறிக்கை உங்களுக்கு வழங்கப்பட்டதா என வினவியதற்கு அவர் இல்லை என பதிலளித்தார்.

இதையடுத்து, மரபணு பரிசோதனை அறிக்கை படி, உங்களது தங்கையின் மரபணுவுக்கும் மருமகனின் மரபணுவுக்கும் ஒத்துபோனதா என நீதவான் வினவியதற்கு, அவர் ஆம் என பதிலளித்தார்.

இறுதியாக, உங்களது தங்கை உயிரிழந்தமைக்கான காரணம் எதுவென கருதுகிறீர்கள் என வினவியதற்கு, அவர், “குண்டுவெடிப்பு சம்பவமே காரணமாகும்” என தெரிவித்து, தனது சாட்சியத்தை நிறைவு செய்தார்.

சாட்சியங்களை ஆராய்ந்த நிதவான், வேலாயுதம் வேலாயுதசாமி சரோஜினி குண்டுவெடிப்பிலேயே உயிரிழந்தார் என நிருபிக்கப்படுவதை அடுத்து, அவரது மரண சான்றிதழை அவரது மகனுக்கு வழங்குமாறு உத்தரவிட்டார்.

பெனடிக் ஜோய் ஜெயராஜின் மரண விசாரணை

அடுத்தாதாக கொச்சிகடை குண்டு வெடிப்பு சம்பவத்தில் உயிரிழந்த பெனடிக் ஜோய் ஜெயராஜின் மரண விசாரணை எடுத்துகொள்ளப்பட்டது.

இதற்கு சாட்சியாளராக, அவரது மைத்துனன் சபரிமுத்து செபஸ்டியன் ஆஜரானார்.

இதன்போது, “உயிரிழந்த பெனடிக் ஜோய் ஜெயராஜின் உடற்பாகங்கள், விசாரணைக்கென இன்னும் பிரேத அறையில் வைக்கப்பட்டுள்ளன. அது இனி விசாரணைக்கு தேவைப்படாது. சாட்சிகளின் வாக்குமூலத்துக்கு அமைய, அவர் குண்டு வெடிப்பில்தான் உயிரிழந்துள்ளார் என நிரூபனமாகிறது” என நீதவான் தெரிவித்தார்.

ஆகவே, உயிரிழந்தவரின் மரண சான்றிதழை, உயிரிழந்தவரின் வீட்டு முகவரிக்கு அனுப்புமாறு பொலிஸாருக்கு நீதவான் பணிப்புரை விடுத்தார்.

அத்துடன், உயிரிழந்தவரின் உடற்பாகங்களை பெறுவதற்கான கடிதம் நீதிமன்றத்தின் ஊடாக சட்டவைத்திய அதிகாரிக்கு அனுப்பப்டும். இதற்கு தேவையான மேலதிக உதவிகளை பொலிஸாரிடம் இருந்து பெற்றுக்கொள்ளலாமென, சாட்டியாளர் சபரிமுத்து செபஸ்டியனுக்கு நீதவான் தெரிவித்தார்.

இதையடுத்து, அவரது உடற்பாகங்களை பெறுப்பேற்க நீங்கள் உடன்படுகிறீர்களா என வினவியதற்கு, சாட்சியாளர், “ஆம்” என மன்றுரைத்தார்.

இதையடுத்து, மேற்படி வழக்கு தொடர்பான வழக்கு விசாரணை ஜூன் 6ஆம் திகதிக்கு ஒத்திவைத்து உத்தரவு பிறப்பிக்கப்பட்டது.

----------------------------------------------------------------------------------------------------------------------------------------------------------------------------

--------------------------------------------------------------------------------------------------------------------------------------------------------------------------

இந்திய லோக்சபா தேர்தல் முடிவுகள் வெளியாகத் தொடங்கியுள்ளன. இதுவரை வெளியாகியுள்ள முடிவுகளின் அடிப்படையில், பாஜக கூட்டணி முன்னிலை வகிக்கிறது.

இந்தியாவின் 17ஆவது லோக்சபாவை யார் கைப்பற்றப்போகிறார்கள் என்று உலகமே உற்றுப் பார்த்துக்கொண்டு உள்ளது. அடுத்த 5 ஆண்டு காலத்துக்கு, இந்திய எந்தத் திசையில் பயணிக்கப் போகிறது என்பதை இன்றைய தேர்தல் முடிவுதான் தீர்மானிக்கப் போகின்றன.

2019.05.21 மு.ப 09.44

உயிர்த்த ஞாயிறு தினத்தன்று (21) கொழும்பு - ஷங்கிரி-லா ஹோட்டலில் தற்கொலைக் குண்டுத் தாக்குதலை நடத்தி உயிரிழந்தவர், தேசிய தௌஹீத் ஜமாஅத் அமைப்பின் தலைவர் மொஹமட் சஹ்ரான் ஹஸீம்தான் என, மரபணுப் பரிசோதனை (டீஎன்ஏ) மூலம் உறுதியாகியுள்ளதென, அரச இரசாயனப் பகுப்பாய்வுத் திணைக்களத் தகவல்கள் உறுதி செய்துள்ளன.

சஹ்ரானின் மனைவி, மகள், சகோதரி ஆகியோரின் உயிரியல் மாதிரிகளைக் கொண்டு, கடந்த சில தினங்களாகவே மேற்கொள்ளப்பட்ட மரபணுப் பரிசோதனையின் போதே, இந்த விடயம் உறுதியாகியுள்ளதென, அரச இரசாயனப் பகுப்பாய்வுத் திணைக்களத்தின் உயரதிகாரியொருவர் தெரிவித்தார்.

இதேவேளை, கொழும்பு சினமன் கிராண்ட் மற்றும் ஷங்கிரி-லா ஆகிய இரு ஹோட்டல்களிலும் மட்டக்களப்பு சீயோன் தேவாலயத்திலும், தெஹிவளை ட்ரொபிக்கல் இன் விடுதியிலும் தற்கொலைக் குண்டுத் தாக்குதல்களை நடத்தி உயிரிழந்த குண்டுதாரிகள் தொடர்பான டீஎன்ஏ பரிசோதனைகள் நிறைவுசெய்யப்பட்டு, உயிரிழந்தவர்கள் தொடர்பான உறுதிப்படுத்தல்கள் மேற்கொள்ளப்பட்டுள்ளன.

இந்த குண்டுதாரிகள் தொடர்பான டீஎன்ஏ பரிசோதனை அறிக்கைகள், இன்றைய தினம் (21), குற்றப்புலனாய்வுத் திணைக்களத்திடம் ஒப்படைக்கப்படவுள்ளது.

கொச்சிக்கடை புனித அந்தோனியார் தேவாலயம் மற்றும் நீர்கொழும்பு - கட்டுவாபிட்டிய புனித செபஸ்தியர் தேவாலயம் ஆகியவற்றில் தற்கொலைக் குண்டுத் தாக்குதல்களை நடத்திய இருவர் தொடர்பான டீஎன்ஏ பரிசோதனை ​ உறுதிப்படுத்தல்கள், ஏற்கெனவே மேற்கொள்ளப்பட்டிருந்தமை குறிப்பிடத்தக்கது.

----------------------------------------------------------------------------------------------------------------------------------------------------------------------------

----------------------------------------------------------------------------------------------------------------------------------------------------------------------------

சிரியாவில் ஐ.எஸ் பயங்கரவாதிகளுடன் பயிற்சிபெற்ற இலங்கையைச் சேர்ந்த மூவரால், இலங்கைக்கு அனுப்பிவைக்கப்பட்ட 40 இலட்சம் ரூபாய்க்கும் மேற்பட்ட தொகை தொடர்பிலான விசாரணைகள் ஆரம்பிக்கப்பட்டுள்ளனவென, பயங்கரவாத விசாரணைப் பிரிவு, கொழும்பு மேலதிக நீதவான் தனுஜா ஜயதுங்கவின் கவனத்துக்குக் கொண்டுவந்தது.  

ஐ.எஸ் பயங்கரவாத அமைப்புடன் இணைவதற்காக, சிரியாவுக்குச் சென்ற முதலாவது இலங்கையர்கள் என்று கருதப்படும் மொஹமட் முஹூசீன் இஷாக் அஹமட், அவரின் சகோதரரான சர்பாஸ் நிலாம் மற்றுமோர் இலங்கையரான மொஹமட் அரூஸ் மொஹமட் சுஹைர் ஆகியோராலேயே அந்தப் பணம் நாட்டுக்கு அனுப்பிவைக்கப்பட்டுள்ளது.

இதுதொடர்பில் முன்னெடுக்கப்பட்ட விசாரணைகளின் பிரகாரம், அந்தப் பணத்தின் ஒருதொகுதி, தெஹிவளை பிரதேசத்திலுள்ள வீடொன்றிலிருந்து மீட்கப்பட்டுள்ளன என  பயங்கரவாதப் புலனாய்வுப் பிரிவு, நீதிமன்றத்தின் கவனத்துக்கு நேற்றுமுன்தினம் (15) கொண்டுவந்தது.

மொஹமட் முஹூசீன் இஷாக் அஹமட் என்பவரின் பெற்றோரால், கல்கிஸை, ஸ்ரீமத் பரான் ஜயதிலக்க மாவத்தையிலுள்ள வீட்டுக்கு, அந்தப் பணத்தின் ஒருதொகுதி அனுப்பிவைக்கப்பட்டுள்ளது. அது தொடர்பில், அவருடைய தந்தை, தன்னுடையப் பிரிவுக்கு முறைப்பாடு செய்துள்ளார் என பயங்கரவாதப் புலனாய்வுப் பிரிவு, தெரிவித்துள்ளது.

சிரியாவில் ஐ.எஸ் அமைப்பிலிருந்த தன்னுடைய மகனான மொஹமட் முஹூசீன் இஷாக் அஹமட்டின் தங்கையான அஸ்மாவுடன், இந்த நாட்டுக்கு வரும் ஒருவரால் பொதியொன்று கொண்டுவந்து தரப்படுமென, சிரியாவிலிருந்த மூவரில் மற்றொருவரான  மொஹமட் அரூஸ் மொஹமட் சுஹைர் என்பவரால், 2018 செப்டெம்பர் மாதத்தில், ஒருநாளன்று அறிவுறுத்தப்பட்டுள்ளது என்றும் தனது முறைப்பாட்டில் தந்தை தெரிவித்துள்ளார்.

வட்ஸ்அப்பின் ஊடாக அழைப்பொன்றை ஏற்படுத்தும் வரையிலும்  அந்தப் பொதியை மிகக் கவனமாகப் பார்த்துக்கொள்ளுமாறும் மொஹமட் முஹுசீன் இஷாக் அறிவுறுத்தியதாக, பயங்கரவாத புலனாய்வுப் பிரிவினரிடம் தெரிவித்துள்ளார்.

இந்த வட்ஸ்அப் அழைப்பு விடுக்கப்பட்டதன் பின்னர், சில நாள்களுக்குப் பின்னர், முகத்தை முழுமையாக மறைத்திருந்த பெண்ணொருவர், தன்னுடைய வீட்டுக்கு வந்து, சிரியாவில் ஐ.எஸ் அமைப்பிலிருக்கும் மொஹமட் அரூஸ் மொஹமட் சுஹைர் என்பவருக்கு வழங்குமாறுகூறி, பொதியொன்றை, தன்னுடைய மகளிடம் வழங்கியுள்ளார். அந்தப் பொதியை சோதிக்காமல், வீட்டிலிருந்த அலுமாரியில் அப்படியே வைத்துவிட்டதாக முறைப்பாட்டில் தெரிவிக்கப்பட்டுள்ளது.

அதன்பின்னர், நான்கு நாள்களுக்குப் பின்னர், முகத்தை முழுமையாக மூடிய நபரொருவர் தன்னுடைய வீட்டுக்கு வந்து மொஹமட் அரூஸ் மொஹமட் சுஹைரிடம் கொடுக்குமாறு மற்றொரு பொதியை வழங்கிவிட்டுச் சென்றார் என்றும், அந்தப் பொதியையும் அதே அலுமாரியிலேயே வைத்துள்ளதாக முறைப்பாட்டில் தெரிவித்துள்ளார்.

“அதன்பின்னர், மொஹமட் அரூஸ் மொஹமட் சுஹைர் என்பவர் தனக்கு அழைப்பையெடுத்தார். அந்தப் பொதிகளிலிருக்கும் பணத்தை, அமெரிக்க டொலர்களாக மாற்றி, தான் அறிவிக்கும் வரையிலும், வீட்டில் மிகவும் பாதுகாப்பான இடத்தில் வைக்குமாறு அறிவித்தார்.

“அவ்விரு பொதிகளையும் பிரித்துப்பார்த்த போது, அதில் 40 இலட்சம் ரூபாய்க்கும் அதிகமான பணம் இருந்தது.

“அந்தப் பணத்தை வௌ்ளவத்தை பிரதேசத்திலுள்ள வெளிநாட்டு நாணய மாற்று நிலையங்கள் மூன்றுக்கு எடுத்துச்சென்று, அமெரிக்க டொலர்களாக மாற்றி, வீட்டில் படுக்கையறையில் பாதுகாப்பாக வைத்ததாக முறைப்பாட்டில் மேலும் தெரிவித்துள்ளார்.  

“மேலே குறிப்பிட்டவாறே, பயங்கரவாதப் புலனாய்வுப் பிரிவினரிடம்  வாக்குமூலம் அளிக்கப்பட்டது. அதன்பின்னர், அந்தப் பணத்தை தமது பொறுப்பின் கீழ் கொண்டுவந்துள்ளோம்.

இந்த 23,500 ரூபாய் பெறுமதியான அமெரிக்க டொலர்களும் சட்டபூர்வமான தாள்களாக என்பதுத் தொடர்பில் ஆராய்ந்து பார்ப்பதற்கு, மத்திய வங்கிக்குக் கட்டளையிடுமாறும் பயங்கரவாத புலனாய்வு பிரிவினர், நீதிமன்றத்தின் கவனத்துக்குக” கொண்டுவந்தனர்.

முன்வைக்கப்பட்ட காரணங்களை கவனத்தில் கொண்ட நீதிமன்றம், அமெரிக்க டொலர்களை பரிசோதனைக்கு உட்படுத்தி அதன் முழுமையான அறிக்கையை நீதிமன்றத்துக்குச் சமர்ப்பிக்குமாறு மத்திய வங்கியின் நிதி முகாமையாளருக்கு கட்டளையிட்டது.

--------------------------------------------------------------------------------------------------------------------------------------------------------------------------

--------------------------------------------------------------------------------------------------------------------------------------------------------------------------

சிரியாவில் இடம்பெற்றுவரும் ஐ.எஸ் அமைப்பின் ஆயுதப் பயிற்சியில், இலங்கையர்கள் மூவர் ஆயுதப் பயிற்சி எடுத்து வருவதாகவும் அவர்களால் இலங்கைக்கு அனுப்பப்பட்ட 40 இலட்சம் ரூபாய் தொடர்பான விசாரணைகள் ஆரம்பிக்கப்பட்டு உள்ளதாகவும், பயங்கரவாத விசாரணைப் பிரிவினரால், கொழும்பு மேலதிக நீதவான் தனூஜா ஜயதுங்கபவிடம் தெரிவிக்கப்பட்டது.

ஐ.எஸ் பயங்கரவாத அமைப்புடன் இணைந்துகொள்வதற்காக, இலங்கையிலிருந்து முதன்முதலில் சென்றவரெனக் கருதப்படும் மொஹமட் முஹுசித் இஷாக் அஹமட் மற்றும் அவரது சகோதரரான சர்ஃபாஸ் நிலாம் ஆகிய இருவரும் மற்றொரு இலங்கையரான மொஹமட் அரூஸ் மொஹமட் சுஹைர் ஆகிய மூவரும், இலங்கைக்கு பணம் அனுப்பியுள்ளனர் என்றும் அந்தப் பணத்தில் ஒரு பகுதி, தெஹிவளை பிரதேச வீடொன்றிலிருந்து கண்டுபிடிக்கப்பட்டதாகவும், பயங்கரவாத விசாரணைப் பிரிவினர், நீதிமன்றத்தில் தெரிவித்தனர்.

-----------------------------------------------------------------------------------------------------------------------------------------------------------------------

-----------------------------------------------------------------------------------------------------------------------------------------------------------------------

-----------------------------------------------------------------------------------------------------------------------------------------------------------------------

-----------------------------------------------------------------------------------------------------------------------------------------------------------------------

உயிர்த்த ஞாயிறு தினத்தன்று, தற்கொலைக் குண்டுத் தாக்குதல்களை மேற்கொள்வதற்காகப் பயன்படுத்தப்பட்ட குண்டுகள் அனைத்துமே, மிகவும் திறமையான முறையில் வடிவமைக்கப்பட்டுள்ளன என்றும் இவற்றை, இதற்கு முன்னர் இலங்கை இராணுவமோ அல்லது தமிழீழ விடுதலைப் புலிகள் இயக்கமோ பயன்படுத்தியிருக்கவில்லை என்றும் கண்டறியப்பட்டுள்ளதாகத் தெரிவிக்கப்படுகின்றது.

பல்வேறான இரசாயனப் பதார்த்தங்களை உருக்கியே, இந்தக் குண்டுகள் தயாரிக்கப்பட்டுள்ளன என்றும் இந்தக் குண்டுகளை வெடிக்க வைப்பதற்காக, மின்குமிழ்களில் பயன்படுத்தும் நுண்ணிழைகளையே பயன்படுத்தியுள்ளனர் என்றும் கண்டறியப்பட்டுள்ளது.

குண்டுதாரிகளின் முதுகுப் பொதியில், இவ்வாறான குண்டு இருந்துள்ளமை தொடர்பில், விசாரணைகளின் போதும் இதுவரையில் கண்டறியப்படவில்லை என்றும் என்றும் இராணுவ தரத்திலான வெடிபொருள்களை இவர்கள் பயன்படுத்தியுள்ளமை, நம்பமுடியாத உண்மை என்றும் தெரிவிக்கப்படுகின்றது.

வெடிச்சம்பவம் இடம்பெற்றதை அடுத்தும் கூட, TNT மற்றும் RDX போன்ற வெடிபொருள்களைக் கண்டறிய முடியவில்லை என்றும் தெரியவருகின்றது.

ஐ.எஸ் பயங்கரவாத அமைப்பு, இவ்வாறான வெடிகுண்டுகளை, உலகின் பல இடங்களிலும் பயன்படுத்தியுள்ளனர் என்றும் வெடிகுண்டுகளில் கலக்கப்படும் இரசாயனங்கள், சரியான அளவில் கலக்கப்பட்டிருந்தால், பேரழிவு ஏற்படக்கூடும் என்றும், விசாரணைகளை மேற்கொள்ளும் தரப்பிலிருந்து தெரியவந்துள்ளது.

அத்துடன், இந்த வெடிபொருள்களைத் தயாரிப்பதற்கான நுட்பங்கள், வெளிநாடுகளில் இருந்தே பெற்றுக்கொள்ளப்பட்டு இருக்கலாம் என்று சந்தேகிப்பதாகவும் தெரிவிக்கப்படுகின்றது. 

உயிர்த்த ஞாயிறு தாக்குதல் நடைபெற்ற பின்னர், தற்கொலைக் குண்டுதாரிகளால் பயன்படுத்தப்பட்ட பாணந்துறை பகுதியிலுள்ள வீடொன்றை, பொலிஸார் முற்றுகையிட்டிருந்தனர். வெடிகுண்டுகளைத் தயாரிப்பதற்கான இரசாயனப் பதார்த்தங்கள் கலக்கப்பட்ட பகுதியாக அது இருப்பதற்கான ஆதாரங்கள் அங்கு சிக்கியதாகவும் இரசாயனங்கள் நிரப்பப்பட்டு எரிக்கப்பட்ட இரண்டு கலன்களை, பொலிஸார் கைப்பற்றியதாகவும், ஆனால், குண்டுதாரிகளால் அங்கு இருந்த சாட்சியங்கள் அனைத்தும் அழிக்கப்பட்டிருந்ததாகவும், தகவல்கள் தெரிவிக்கின்றன.

இதேவேளை, ஷங்ரி-லா ஹோட்டலில் தற்கொலைக் குண்டுத்தாக்குதலை மேற்கொண்ட குண்டுதாரியின் உடலில் இருந்து, மின்குமிழ்களுக்குப் பயன்படுத்தும் நுண்ணிழையைக் கண்டுபிடித்ததாகவும் அதேபோன்ற சிறிய கம்பி, பாணந்துறையில் முற்றுகையிட்ட வீட்டிலிருந்து கண்டுபிடித்ததாகவும் தெரியவருகின்றது.

இந்தத் தற்கொலைக் குண்டுத்தாக்குதலுக்குப் பயன்படுத்தப்பட்ட பாதுகாப்புத் தரப்பினரால் கண்டுபிடிக்கப்பட்ட அனைத்துச் சாட்சியங்களும், பரிசோதனைக்காக, ஆய்வுக்கூடத்துக்கு சமர்ப்பிக்கப்பட்டுள்ளதாகவும் தெரியவருகின்றது.

-----------------------------------------------------------------------------------------------------------------------------------------------------------------------

-----------------------------------------------------------------------------------------------------------------------------------------------------------------------

நாட்டின் சில பகுதிகளில் இடம்பெற்ற பதற்றமான சூழ்நிலையைக் கருத்திற்கொண்டு, இன்று (13) இரவு 9 மணி முதல் நாளை (14) அதிகாலை நான்கு மணிவரை, நாடு முழுவதற்கும், ஊரடங்குச் சட்டம் அமுல்படுத்தப்பட்டிருந்தது.

இது தொடர்பில் அறிக்கையொன்றை வெளியிட்டுள்ள பொலிஸ் ஊடகப் பிரிவு, வடமேல் மாகாணத்துக்கு, மறு அறிவித்தல் விடுக்கும் வரையிலும் கம்பஹா மாவட்டத்தில்,நாளை காலை 6 மணி வரையிலும், ஊரடங்குச் சட்டம் அமுலில் இருக்குமென அறிவித்துள்ளது.

அந்த வகையில், கம்பஹா மாவட்டத்தின் கம்பஹா, மினுவங்கொட, தொம்பே, கணேமுல்ல, கிரிந்திவெல, மல்வத்துஹிரிபிட்டிய, மீரிகம, நிட்டம்புவ, பூகொட, வேயங்கொட, வீரகுல, வெலிவேரிய, பெல்லேவெல மற்றும் யக்கல பொலிஸ் பிரிவுகளிலேயே, இந்த ஊரடங்குச் சட்டம் அமுல்படுத்தப்பட்டதாக, பொலிஸ் ஊடகப் பேச்சாளர் ருவன் குணசேகர தெரிவித்தார்.

தவிர, வடமேல் மாகாணத்துக்குட்பட்ட, குளியாபிட்டிய, பிங்கிரிய, தும்மலசூரிய, ஹெட்டிபொல, கொபெய்கனே, ரஸ்நாயக்கபுர போன்ற பொலிஸ் பிரதேசங்களுக்கு, மறு அறிவித்தல் விடுக்கும் வரையில், ஊரடங்குச் சட்டம் அமுலில் இருக்குமென்றும், ஊடகப் பேச்சாளர் கூறினார்.

முஸ்லிம்களுக்கு எதிராக கட்டவிழ்த்துவிடப்பட்டுள்ள வன்முறைகளை கட்டுப்படுத்தும் நோக்கிலேயே பொலிஸ் ஊரடங்குச் சட்டம் அமுல்படுத்தப்பட்டதாக, பொலிஸ் தலைமையகம் கூறியது.

இருப்பினும், ஊரடங்குச் சட்டம் அமுல்படுத்தப்பட்ட நிலையில், முஸ்லிம்களின் வர்த்தக நிலையங்கள், வீடுகளின் மீது தாக்குதல்கள் நடத்தப்பட்டதுடன், சொத்துக்களுக்கும் சேதம் விளைவிக்கப்பட்டுள்ளது.

பொலிஸார், படையினரின் செயற்பாடுகளுக்கு கடுமையான எதிர்ப்பை வெளிப்படுத்தியோர், படையினரின் முன்னிலையிலேயே சொத்துகளுக்கு சேதம் விளைவித்துள்ளனர்.

வீதியோரங்களிலிருந்த தற்காலிக வர்த்த நிலையங்கள் அடித்து நொறுக்கப்பட்டுள்ளன. இன்னும் சில கடைகள், பிரட்டி உருட்டித்தள்ளப்பட்டுள்ளன.

இதனால், முஸ்லிம்கள் பாதுகாப்பான இடங்களை நோக்கி இடம்பெயர்ந்துள்ளனர். இன்னும் சிலர், வயல்வெளிகளில் கூடாரங்களை அமைத்துத் தஞ்சமடைந்துள்ளனர் என, அங்கிருந்து கிடைக்கும் தகவல்கள் தெரிவிக்கின்றன.

இந்நிலையில், அறிக்கையொன்றை விடுத்துள்ள அகில இலங்கை ஜமியத்துல் உலமா சபை, பொறுமை காக்குமாறு சகல முஸ்லிம்களிடமும் கேட்டுகொண்டுள்ளது.

சிலாபத்தை சேர்ந்த வர்த்தரொருவர், தன்னுடைய பேஸ்புக் கணக்கில் பதிவிட்ட கருத்தொன்றை அடுத்து ஏற்பட்ட பதற்றமான நிலமையைக் கட்டுப்பாட்டுக்குள் கொண்டுவருவதற்கு, சிலாபத்தில், நேற்று (12) பொலிஸ் ஊரடங்கு பிறப்பிக்கப்பட்டது. அது, இன்று காலை 4 மணிக்கு தளர்த்தப்பட்டது.

இந்நிலையில், குருநாகல், அலகொலதெனிய பிரதேசத்தில் இரண்டு ஏக்கர் காணியிலுள்ள இரண்டு மாடிக்கட்டிடத்தை தடைச் செய்யப்பட்ட இயக்கமான தேசிய தௌஹீத் ஜமாஅத் அமைப்புக்கு வழங்கியதாக கூறப்படும் அந்த பிரதேசத்தைச் சேர்ந்த 72 வயதான வர்த்தகரொருவர் கைதுசெய்யப்பட்டார்.

இதேவேளை, அந்த கட்டத்தில் நடத்தப்பட்ட தீவிரவாத பரப்புரையில், குருநாகல் போதனா வைத்தியசாலையில் கதிர்இயக்கப் பிரிவின் அதிகாரி கைதுசெய்யப்பட்டார். இதனையடுத்தே, அப்பகுதியில் நேற்றுமுன்தினம் இரவிலிருந்து பதற்றமான நிலைமையொன்று ஏற்பட்டது.

அந்தப் பதற்றமான நிலைமை தொடர்ந்திருந்த நிலையிலேயே, முஸ்லிம்களுக்கு எதிரான வன்முறை இன்று மாலைவரையிலும் தொடர்ந்தது. அதனையடுத்து, பாதுகாப்பை பலப்படுத்துவதற்கு பொலிஸ் ஊரடங்குச் சட்டம் அமுல்படுத்தப்பட்டது.

இந்தியாவுக்குள் தாம், தமக்கான இடமொன்றை ஸ்தாபித்துக் கொண்டதாக, இஸ்லாமிய அரசு என்ற பெயரில் இயங்கும் ஐ.எஸ் பயங்கரவாத அமைப்பு அறிவித்துள்ளது.

பிரிவினைவாதிகளுக்கும் இந்திய பாதுகாப்புப் படையினருக்கும் இடையில், காஷ்மிர் பிரதேசத்தில் இடம்பெற்ற மோதலொன்றைத் தொடர்ந்தே, தாம் தமக்கான இடமொன்றை ஸ்தாபித்ததாக, அவ்வமைப்பு அறிவித்துள்ளது.

இந்த மோதலின் போது, ஐ.எஸ் அமைப்பு உறுப்பினர் ஒருவர் உயிரிழந்துள்ளார் என்றும், அவ்வமைப்பின் அமாக் செய்திச் சேவை, நேற்றைய தினம் (10), செய்தியொன்றை வெளியிட்டுள்ளது.

அந்தச் செய்தியில் மேலும் குறிப்பிட்டுள்ள ஐ.எஸ் அமைப்பு, இந்தியாவில் தாம் ஸ்தாபித்த இடத்துக்கு, 'விலாயஹ் ஒஃப் ஹிந்த்' எனப் பெயரிட்டுள்ளதாகவும் குறிப்பிட்டுள்ளது.

காஷ்மிரின் ஷொப்பியான் மாவட்டத்தைச் சேர்ந்த அம்ஷிபோரா நகரிலேயே, இஸ்லாமியப் பிரிவினைவாதிகளுக்கும் இந்திய பாதுகாப்புப் படையினருக்கும் இடையில் மோதல் இடம்பெற்றுள்ளது. இதில், தமது அமைப்பைச் சேர்ந்த உறுப்பினர்கள் காயமடைந்ததாக, ஐ.எஸ் அமைப்பு அறிவித்துள்ளது.

இந்த மோதலில், இஷாக் அஹ்மட் சோஃபி என்ற தமது போராளி உயிரிழந்ததாக அவ்வமைப்பு அறிவித்துள்ள அதேவேளை, இதனை, இந்தியப் பொலிஸாரும் உறுதிப்படுத்தியுள்ளனர்.

ஈராக் மற்றும் சிரியாவில், ஆயிரக்கணக்கான ஏக்கர் நிலப்பரப்பைத் தம்வசம் கொண்டிருந்த ஐ.எஸ் அமைப்பு, ஈராக் மற்றும் சிரியாவில், கலீஃபா ஒன்றையும் அறிவித்திருந்தது. எவ்வாறாயினும், அந்தப் பூமிப் பிரதேசத்தை, கடந்த பெப்ரவரி மாதத்தில், அவ்வமைப்பு இழந்து, பாரிய தோல்வியமைடந்தது.

அந்தத் தோல்வியைத் தொடர்ந்தே, தற்கொலைக் குண்டுத் தாக்குதல்கள் போன்ற பாரிய தாக்குதல்களை நடத்தி, தமது பலத்தைக் காண்பித்து வருகின்றனர். இலங்கையில் அவ்வாறு நடத்தப்பட்ட தாக்குதல்களுக்கான பொறுப்பையும், அவ்வமைப்பு ஏற்றுக்கொண்டுள்ளமை குறிப்பிடத்தக்கது.

(புதுடில்லி - இந்தியா ரொய்டர்ஸ் செய்திச் சேவை)

--------------------------------------------------------------------------------------------------------------------------------------------------------------------------

--------------------------------------------------------------------------------------------------------------------------------------------------------------------------

“வாப்பாவின் பெயரை கூறமாட்டேன். வாப்பாவின் பெயரை சொன்னால், என்னுடைய காதுகள் இரண்டையும் வாயையும் வெட்டிவிடுவதாக வாப்பா சொன்னார் என, சஹ்ரானின் நான்கு வயதான மகள் கூறியுள்ளார் என, அம்பாறை பொலிஸ் மற்றும் வைத்தியசாலை தகவல்கள் தெரிவிக்கின்றன.

கொழும்பு, ஷங்கரில்லா ஹோட்டலில் தற்கொலைத் தாக்குதல் நடத்திய தேசிய தௌஹீத் ஜமாஅத் அமைப்பின் பயங்கரவாத தலைவராக மொஹமட் சஹ்ரான் என்பவரின் நான்கு வயது மகளான மொஹமட் சஹ்ரான் ருசேசினாவே மேற்கண்டவாறு தெரிவித்துள்ளார்.

நான்கு வயதான அந்த பெண் பிள்ளையிடம் பாதுகாப்பு தரப்பினர் சில விடயங்களை கேட்டபோதே அவர் மேற்கண்டவாறு தெரிவித்துள்ளார்.

அம்பாறை சாய்ந்தமருது வீட்டில் இடம்பெற்ற குண்டுவெடிப்பில் காயமடைந்த சஹ்ரானின் மனைவி மற்றும் மகள், மேலதிக சிகிச்சைகளுக்காக கொழும்புக்கு, கடந்த 8 ஆம் திகதி அழைத்துவரப்பட்டனர்.

அவ்விருவரும் தடுத்து வைக்கப்பட்டு விசாரணை

Views ({{hitsCtrl.values.hits}}) | Comments (0)
‘ஊசியை வைத்தே அம்மாவின் சடலத்தை கண்டேன்’

அன்புள்ள வாசகர்களே,

நீங்கள் தெரிவிக்கும் கருத்துகளுக்கு நிர்வாகம் எவ்விதத்திலும் பொறுப்பாகாது. அவை உங்களின் தனிப்பட்ட கருத்துகளாகும். உங்களின் கருத்துகள் ஆசிரியரின் தகுந்த தணிக்கைக்குப் பிறகே பதிவேற்றம் செய்யப்படும் என்பதைக் கவனத்திற்கொள்க. உங்கள் யோசனைகளையும் எங்களுக்கு அனுப்புங்கள். .
All the content on this website is copyright protected and can be reproduced only by giving the due courtesy to 'www.tamilmirror.lk' Copyright © 2012 Wijeya Newspapers Ltd.