‘பொத்துவில் மத்திய கல்லூரிக்கு உயர்தர தொழில்நுட்பப் பிரிவு வேண்டும்’

அம்பாறை, பொத்துவில் மத்திய கல்லூரியில் உயர்தர தொழில்நுட்பப் பிரிவை ஆரம்பிக்குமாறு, பெற்றோர்கள் கோரிக்கை விடுத்துள்ளனர்.

அக்கரைப்பற்று கல்வி வலயத்திலுள்ள 1ஏபி பாடசாலைகளுள் ஒன்றாக பொத்துவில் மத்திய கல்லூரி விளங்குகின்றது. பொதுப் பரீட்சை பெறுபெறுகளின் பிரகாரமும் இணைக்கலைத்திட்ட செயற்பாடுகள் மூலமும், அக்கரைப்பற்று கல்வி வலயத்துக்குப் பெருமை தேடிக் கொடுக்கும் பாடசாலையாக, மத்திய கல்லூரி விளங்குகின்றது.

நவீன யுகத்தின் கல்விச் சவால்களை வெற்றிகொள்ளும் முகமாக, கல்வியமைச்சு, உயர்தர விஞ்ஞானப் பிரிவுடன், ஆயிரம் பாடசாலைத் திட்டத்தில் இணைக்கப்பட்ட பாடசாலைகளில் உயர்தர தொழில்நுட்ப அலகை ஆரம்பித்து நடைமுறைப்படுத்தப்பட்டு வருகின்றது.

எனினும், இக்கல்லூரியில் உயர்தர தொழில்நுட்ப பிரிவு ஆரம்பிக்கப்படாமல் உள்ளமையால் மாணவர்கள், பல்வேறு அசௌகரியங்களுக்கு முகங்கொடுத்து வருகின்றனர் என, பெற்றோர்கள் சுட்டிக்காட்டுகின்றனர்.

இதனால் மாணவர்கள் 50 கிலோமீற்றருக்கு அப்பால் உள்ள அக்கரைப்பற்று, கல்முனை ஆகிய பிரதேசங்களிலுள்ள பாடசாலைகளுக்குச் சென்று, உயர்தர தொழிநுட்பக் கல்வியைப் பயில வேண்டிய துர்ப்பாக்கிய நிலைக்கு ஆளாக்கப்பட்டுள்ளார்கள்.

இதனால், பொருளாதார ரீதியாக பெரும் இன்னல்களை எதிர்கொள்வதாக, பெற்றோர்கள் தெரிவிக்கின்றனர்.

எனவே, பிள்ளைகளின் எதிர்கால நலன்கருதி, பொத்துவில் மத்திய கல்லூரியில் உயர்தர தொழில்நுட்பப் பிரிவை ஆரம்பிக்க, சம்பந்தப்பட்ட அதிகாரிகள் நடவடிக்கை எடுக்கவேண்டுமென, பெற்றோர்கள் கோரிக்கை விடுத்துள்ளனர்.