‘சிட்னியில் தோற்றால் அரசாங்கத்துக்கு ஆபத்து’

இவ்வார இறுதியில், சிட்னியில் நடைபெறும் இடைத் தேர்தலில் அரசாங்கம் தோல்வியடைந்தால், அரசாங்கத்துக்கு ஆபத்தானதாக அமையுமென, அவுஸ்திரேலியப் பிரதமர் மல்கொம் டேர்ண்புல் எச்சரித்துள்ளார்.

இரட்டைப் பிரஜாவுரிமை காரணமாக, பிரதிப் பிரதமரை இழந்த பிரதமர் டேர்ண்புல், பின்னர் ஜோன் அலெக்ஸான்டர் என்ற நாடாளுமன்ற உறுப்பினரையும் இழந்தார். பிரதிப் பிரதமர், தன்னுடைய இரட்டைப் பிரஜாவுரிமையை இல்லாது செய்துவிட்டு, மீண்டும் தேர்தலில் போட்டியிட்டு வெற்றிபெற்றுள்ளார்.

ஆனால், ஜோன் அலெக்ஸான்டரால் மீண்டும் வெற்றிபெற முடியுமா என்ற சந்தேகம் காணப்படுகிறது. பிரதான இரண்டு கட்சிகளும் வெற்றிபெறுவதற்கு, தலா 50 சதவீதமான வாய்ப்பு இருக்கிறது என, இறுதியாக வெளிவந்த கருத்துக்கணிப்புக் கூறுகிறது. எனவே, நாடாளுமன்றத்தில் வெறும் ஒரே ஓர் உறுப்பினரால் பெரும்பான்மையைக் கொண்டுள்ள ஆளுங்கட்சிக்கு, இத்தேர்தல் முக்கியமானதாக மாறியுள்ளத.

“இது மிகவும் இறுக்கமான தேர்தல். உயர்ந்த செலவீமானது. பனெலொங்கில் தொழிலாளர் கட்சி வெற்றிபெறுமாயின், அக்கட்சியின் தலைவர் பில் ஷோர்ட்டின், பிரதமராக வருவதற்கான அதிக வாய்ப்புகள் உள்ளன” என, பிரதமர் டேர்ண்புல் எச்சரித்தார்.