விஷ வாயு கசிவால் இருவர் உயிரிழப்பு

தம்புளை பன்னம்பிட்டிய பிரதேசத்தில்  அமைந்துள்ள பலசரக்குப் பொருள் உற்பத்தி தொழிற்சாலை ஒன்றில் நேற்று இரவு (22) ஏற்பட்ட விஷ வாயு கசிவினால் அங்கு பணிபுரிந்த இருவர் உயிரிழந்துள்ளனர்.

தம்புளை- பன்னம்பிட்டிய பிரதேசத்தைச் ​சேர்ந்த மதுஷான் ஜயவர்தன (வயது 19), என்ற இளைஞனும், தம்புளை எபுல்ஹபே பிரதேசத்தைச் சேர்ந்த எச்.எம். நிரோஷா தில்ருக்சி (வயது 30),என்ற யுவதியுமே இவ்வாறு உயிரிழந்துள்ளனர்.

இயந்திரத்தில் சேர என்ற கிழங்கை பொடி செய்த போது, குறித்த இருவரும் மயங்கி கீழே விழுந்துள்ளனர். பின்னர் இவர்கள் உடனடியாக தம்புளை வைத்தியசாலைக்கு கொண்டு செல்லப்பட்ட போது இடைநடுவில் உயிரிழந்துள்ளனர் என தெரிவிக்கப்படுகிறது.

சம்பவம் தொடர்பில் தம்புளை பொலிஸார் விசாரணைகளை மேற்கொண்டு வருகின்றனர்.