வீட்டுத்திட்டங்கள் மக்களிடம் நாளை மறுதினம் கையளிப்பு

மட்டக்களப்பு - ஏறாவூர் பற்று பிரதேச செயலாளர் பிரிவில், 2 வீடமைப்புத் திட்டங்கள், வீடமைப்பு அமைச்சர் சஜித் பிரேமதாஸவால், நாளை மறுதினம் (09) திறந்து வைக்கப்படவுள்ளதாக, தேசிய வீடமைப்பு அதிகார சபையின் மட்டக்களப்பு மாவட்ட சிரேஷ்ட முகாமையாளர் மா.ஜெகநாதன் தெரிவித்தார்.

ஏறாவூர் பற்று பிரதேச செயலாளர் பிரிவின், சவுக்கடி கிராம சேவையாளர் பிரிவில் 26 வீடுகளைக் கொண்டதாக அமைக்கப்பட்டுள்ள 177ஆவது வீட்டுத்திட்டமான கற்பகதரு கிராமம், 24 வீடுகளைக் கொண்டதாக அமைந்துள்ள 178ஆவது வீட்டுத்திட்டமான நெய்தல் கிராமம் ஆகியனவே, நாளைக் காலை மக்களிடம் கையளிக்கப்படவுள்ளன.

இந்நிகழ்வில், இராஜாங்க அமைச்சர்கள், மாவட்ட நாடாளுமன்ற உறுப்பினர்கள், மாவட்டச் செயலாளர், திணைக்களத் தலைவர்களும் கலந்துகொள்ளவுள்ளனர்.

வீடற்ற மக்களின் வீட்டுத் தேவையை நிவர்த்தி செய்து, நாட்டைக் கட்டியெழுப்பும் நோக்கை அடிப்படையாகக் கொண்ட “செமட்ட சவன” (யாவருக்கும் வீடுத் திட்டம்), வீடமைப்பு அபிவிருத்தி அமைச்சால் நாடளாவிய ரீதியில் முன்னெடுக்கப்பட்டு வருகிறது.

இதற்கமைய முட்டக்களப்பு மாவட்டத்தில் இதுவரை 11 வீட்டுத்திட்டங்கள் மக்களிடம் கையளிக்கப்பட்டுள்ளமை குறிப்பிடத்தக்கது.