காதை கடித்த பாதுகாப்பு உத்தியோகஸ்தர்மீது கிராமவாசிகள் தாக்குதல்

பிரதியமைச்சர் ஒருவரின் பிரதம பாதுகாப்பு உத்தியோகஸ்தரும் மற்றொருவரும் கிராம மக்களால் தாக்கப்பட்ட சம்பவம் பதுரெலியவில் இடம்பெற்றுள்ளது. குறித்த பாதுகாப்பு உத்தியோகஸ்தர், கடை உரிமையாளர் ஒருவரின் காதை கடித்தமையே இதற்கான காரணம்.

மேற்படி பிரதம பாதுகாப்பு உத்தியோகஸ்தர்,  மற்றொரு பாதுகாப்பு உத்தியோகஸ்தருடன் மதுபோதையில் வந்து, கடையொன்றுக்கு முன்னால் சிறுநீர் கழிக்க முற்பட்டதையடுத்து அவருக்கும் கடை உரிமையாளருக்கும் இடையில் வாக்குவாதம் ஏற்பட்டது.

கடைக்கு முன்னால் சிறுநீர் கழிக்க வேண்டாம் என கடை உரிமையாளர் கூறியதையடுத்து ஆத்திரமுற்ற பாதுகாப்பு உத்தியோகஸ்தர், கடை உரிமையாளரின் காதை கடித்ததுடன் அவரை தாக்கியதாகத் தெரிவிக்கப்படுகிறது.

இச்சம்பவத்தை அவதானித்த கிராமவாசிகள் மேற்படி பாதுகாப்பு உத்தியோகஸ்தரை தாக்கியதுடன் அவரை பொலிஸாரிடம் ஒப்படைத்துள்ளனர்.
காயமடைந்த கடை உரிமையாளரும் பாதுகாப்பு உத்தியோகஸ்தரும் தற்போது களுத்துறை நாகொட வைத்தியசாலையில் சிகிச்சை பெற்று வருகின்றனர்.