ஆண்களுக்கான கரப்பந்தாட்டப் போட்டியில் யாழ். பல்கலைக்கழக கரப்பந்தாட்ட அணிக்கு வெற்றி

(கிரிசன்)

யாழ். மாவட்ட கரப்பந்தாட்ட கழகங்களுக்கிடையே நடைபெற்ற ஆண்களுக்கான போட்டியில் யாழ்ப்பாணம் பல்கலைக்கழக கரப்பந்தாட்ட அணி யாழ். மாவட்ட சம்பியனாக தெரிவு செய்யப்பட்டது.

யாழ்.   மாவட்ட கரப்பந்தாட்ட சங்கத்தின் ஏற்பாட்டில் இளவாலை பொலிஸ் நிலையத்திற்கு அண்மையாகவுள்ள மைதானத்தில் நேற்றுமுன்தினம் ஞாயிற்றுக்கிழமை இந்தப் போட்டி நடைபெற்றது.  இறுதிப்போட்டியில் சங்கானை யுத் விளையாட்டுக்கழகமும் யாழ்ப்பாணம் பல்கலைக்கழக அணியும் மோதிக்கொண்டன.

ஐந்து சுற்றுக்கள் கொண்ட இந்தப் போட்டியில் முதல் இரண்டு சுற்றுக்களை பல்கலைக்கழக அணி 25க்கு 21, 25க்கு 22 என்ற புள்ளிகள் அடிப்படையில் வெற்றி பெற்றது.  மூன்றாம் மற்றும் நான்காம்  சுற்றுக்களை  பலத்த எதிர்ப்பின் மத்தியில் யுத் விளையாட்டுக்கழக அணி 25க்கு 22, 25க்கு 23 என்ற புள்ளிகள் அடிப்படையில் வெற்றி பெற்று சமநிலையில் காணப்பட்டது.
 

ஐந்தாம் சுற்றில் முதல் பாதி ஆட்டத்தில் யுத் விளையாட்டுக்கழகம் 08க்கு 06 என்ற நிலையில் பக்கம் மாறிய நிலையில் தொடர்ந்து விளையாடிய பல்கலைக்கழக அணி போட்டி நிறைவில் 16க்கு 14 புள்ளிகள் என்ற அடிப்படையில் வெற்றி பெற்றது. ஆட்ட நிறைவில் பல்கலைக்ழக அணி 03க்கு 02 சுற்றுக்கள் என்ற அடிப்படையில் சங்கானை யுத் அணியை வென்று யாழ். மாவட்ட சம்பியனாக தெரிவு செய்யப்பட்டது.