சிலாபம் பஸ் விபத்தில் 7பேர் காயம்

(ஹிரான் பிரியங்கர ஜயசிங்க)

சிலாபம், மெரவல பிரதேசத்தில் இன்று காலை இடம்பெற்ற வாகன விபத்துச் சம்பவமொன்றில் 7பேர் காயமடைந்த நிலையில் வைத்தியசாலைகளில் அனுமதிக்கப்பட்டுள்ளனர்.

கொழும்பிலிருந்து வவுனியா நோக்கிப் பயணித்துக்கொண்டிருந்த தனியார் பஸ் ஒன்று யாழ்ப்பாணத்திலிருந்து கொழும்பு நோக்கி வந்துகொண்டிருந்த மற்றுமொரு தனியார் பஸ் ஒன்றுடன் நேருக்கு நேர் மோதியதை அடுத்தே இந்த விபத்து சம்பவித்துள்ளது.

சம்பவத்தில் காயமடைந்தவர்கள் சிலாபம் வைத்தியசாலையில் அனுமதிக்கப்பட்டதுடன் அவர்களில் ஒருவர் மேலதி சிகிச்சைக்காக கொழும்பு தேசிய வைத்தியசாலைக்கு மாற்றப்பட்டுள்ளார்.

குறித்த விபத்துச் சம்பவம் தொடர்பான மேலதிக விசாரணைகளை சிலாபம் பொலிஸார் மேற்கொண்டு வருகின்றனர்.