வலைப்பந்தாட்டப் போட்டியில் தெல்லிப்பளை பிரதேச செயலக அணிக்கு வெற்றி

(கிரிசன்)

யாழ். மாவட்ட பிரதேச செயலகங்கள் மற்றும் உதவி அரசாங்க அதிபர் பிரிவுகளுக்கிடையே நடைபெற்ற  வலைப்பந்தாட்டப் போட்டியில் தெல்லிப்பளை பிரதேச செயலக அணி வெற்றியை தனதாக்கிக் கொண்டது.

வடமாகாண விளையாட்டுத் திணைக்களத்தின் ஆதரவுடன்  யாழ். மாவட்ட செயலக விளையாட்டுப் பிரிவு மேற்படி வலைப்பந்தாட்ட போட்டியை நடத்தியது.  

யாழ்ப்பாணம் வேம்படி மகளிர் உயர்தரப் பாடசாலையில் நடைபெற்ற இறுதிப் போட்டியில் சண்டிலிப்பாய் பிரதேச செயலக அணியும் தெல்லிப்பளை பிரதேச செயலக அணியும் கடுமையாக மோதிக்கொண்டன.

நான்கு கால் பாதி ஆட்டங்களைக் கொண்ட இந்தப் போட்டியில் கால் முதல் மூன்று கால் பாதி ஆட்டங்களையும்  தெல்லிப்பளை பிரதேச செயலக அணி 09க்கு 06, 08க்கு 05, 11க்கு 09 என்ற புள்ளிகள் அடிப்படையில் வெற்றி பெற்றனர்.  இறுதி கால் பாதி ஆட்டத்தை சண்டிலிப்பாய் பிரதேச செயலக அணி மிகவும் உற்சாகத்துடன் விளையாடி 08க்கு 06 புள்ளிகள் என்ற அடிப்படையில் வெற்றி பெற்றது.

ஆட்ட நிறைவில் தெல்லிப்பளை பிரதேச செயலக அணி சண்டிலிப்பாய் பிரதேச செயலக அணியை 34க்கு 28 புள்ளிகள் என்ற அடிப்படையில் வெற்றி பெற்று யாழ். மாவட்ட சம்பியனாக தெரிவு செய்யப்பட்டது.