வீதி நிர்மாண வேலைகளில் மோசடி; விசாரணை செய்யுமாறு கோரிக்கை

காத்தான்குடியில், வீதி நிர்மாணப் பணிகளில் ஊழல், மோசடிகள் இடம்பெற்றுள்ளதாக, நேற்றிரவு (21) நடைபெற்ற ஊடகவியலாளர் சந்திப்பின் போது, கிழக்கு மாகாண சபை முன்னாள் உறுப்பினர் பொறியியலாளர் சிப்லி பாறூக் குற்றஞ்சாட்டினார்.

காத்தான்குடி நகர சபைத் தவிசாளர் சுயதீனமான விசாரணைக்குழுவொன்றை நியமித்து, இவற்றை விசாரணை செய்ய வேண்டும் எனவும் அவர் கோரினார்.

இது தொடர்பாக அவர் மேலும் தெரிவிக்கையில் காத்தான்குடியில் தற்போது தரமற்ற வீதிகள் நிர்மாணிக்கப்பட்டுள்ளன எனவும் ஒரு வீதியை நிர்மாணித்து, குறுகிய காலத்துக்குள் அந்த வீதிக்கு மேலால் மற்றொரு வீதி போடப்பட்டுள்ளதாகவும் வீதி நிர்மாணத்தின் போது பயன்படுத்தப்பட்ட கலவை சரியான முறையில் போடப்படாதுள்ளதுடன், வீதியின் அளவு மட்டமும் சரியாகப் பேணப்படவில்லை எனவும் அவர் குற்றஞ்சாட்டினார்.

இவற்றில் பல ஊழல், மோசடிகள் இடம்பெற்றுள்ளதாகத் தான் அறிவதாகவும் அவர் தெரிவித்தார்.

இவை தொடர்பாகவும் கொந்தராத்துக்காரர்களிடம் அரசியல்வாதிகள் தரகுப் பணம் கோருவதாகவும் தான் ஏற்கெனவே சுட்டிக்காட்டி, ஓர் அறிக்கையை விட்டிருந்தாகவும் அவர் தெரிவித்தார்.

அதற்கு காத்தான்குடி நகர சபைத் தவிசாளர் விளக்கம் கோரி, கடிதமொன்றை தனக்கு அனுப்பியுள்ளாரெனவும் அக்கடிதத்துக்துத் தான் விளக்கமளிக்கவுள்ளதாகவும் அவர் மேலும் தெரிவித்தார்.