சரத் என் சில்வாவுக்கு எதிரான நாடாளுமன்ற தெரிவுக் குழு குறித்து சட்டத்தரணிகள் விசனம்

(லக்மால் சூரியகொட, ஆயிஷா ஸுஹைர்)

முன்னாள் பிரதம நீதியரசர் சரத் என் சில்வாவுக்கு எதிரான விசாரணைக்காக நாடாளுமன்ற தெரிவுக்குழுவொன்றை நியமிப்பதை வாபஸ் பெறுமாறு பிரபல சட்டத்தரணிகள் பலர் அரசாங்கத்தை வலியுறுத்தியுள்ளனர்.

இது தொடர்பான மனுவொன்றில் குறைந்தபட்சம், இலங்கை சட்டத்தரணிகள் சங்கத்தைச் சேர்ந்த 153 அங்கத்தவர்கள் கையெழுத்திட்டுள்ளதாக சட்டத்தரணி நிமல் வீரகொடி டெய்லி மிரருக்குத் தெரிவித்தார்.

சிரேஷ்ட குற்றவியல்  சட்டத்தரணி திரந்த வலிலியத்த இப்பிரசாரத்தை ஆரம்பித்துள்ளார்.

இலங்கை ஜனநாயகக் குடியரசின் அரசியலமைப்பின் 107 ஆவது சரத்தின்படி பதவியிலுள்ள நீதிபதிக்கு எதிராக விசாரணை நடத்தமுடியும் எனவும் ஓய்வுபெற்ற நீதிபதியொருவரை விசாரிப்பதற்கு அனுமதி இல்லை எனவும் இம்மனுவில் குறிப்பிடப்பட்டுள்ளது.

இவ்விசாரணை தொடர்பாக எதிர்ப்பையும் கவலையையும் விசனத்தையும் தெரிவித்து தீர்மானம் நிறைவேற்றுவதற்காக சங்கத்தின் விசேட பொதுக்கூட்டத்தை கூட்டுமாறும் இச்சங்கத்தின் தலைவர் ஷிப்லி அஸீஸை மேற்படி சட்டத்தரணிகள் கோரியுள்ளனர்.