நியூசிலாந்திற்குக் கிரிக்கெட் சுற்றுப்பயணம் மேற்கொண்டுள்ள மேற்கிந்தியத் தீவுகள் அணிக்கும், நியூசிலாந்து அணிக்குமிடையிலான 3 போட்டிகள் கொண்ட டெஸ்ட் தொடரின் முதலாவது போட்டியின் மூன்றாம் நாளில் மேற்கிந்தியத் தீவுகள் அணி போட்டியை வெளிப்படுத்தியுள்ளது, எனினும் நியூசிலாந்து அணி தொடர்ந்தும் முன்னிலையில் காணப்படுகிறது.
2 விக்கெட்டுக்களை இழந்து 67 ஓட்டங்களுடன் இன்றைய நாளை ஆரம்பித்த மேற்கிந்தியத் தீவுகள் அணி 213 ஓட்டங்களுக்குச் சகல விக்கெட்டுக்களையும் இழந்தது.
அவ்வணி சார்பாக ஷிவ்நரின் சந்தர்போல் 76 ஓட்டங்களையும், டெரன் பிராவோ 40 ஓட்டங்களையும், டெரன் சமி ஆட்டமிழக்காமல் 27 ஓட்டங்களையும் பெற்றனர்.
பந்துவீச்சில் நியூசிலாந்து அணி சார்பாக ரிம் சௌதி 4 விக்கெட்டுக்களையும், ட்ரென்ட் போல்ட்ற் 3 விக்கெட்டுக்களையும், இஷ் சோதி 2 விக்கெட்டுக்களையும் கைப்பற்றினர்.
இதனபடிப்படையில் பொலோ ஒன் முறையில் துடுப்பெடுத்தாடப் பணிக்கப்பட்ட மேற்கிந்தியத் தீவுகள் அணி இன்றைய நாள் முடிவில் 2 விக்கெட்டுக்களை இழந்து 168 ஓட்டங்களுடன் காணப்படுகிறது.
துடுப்பாட்டத்தில் மேற்கிந்தியத் தீவுகள் அணி சார்பாக டெரன் பிராவோ ஆட்டமிழக்காமல் 72 ஓட்டங்களையும், கேர்க் எட்வேர்ட்ஸ் 59 ஓட்டங்களையும் பெற்றனர்.
பந்துவீச்சில் நியூசிலாந்து அணி சார்பாக ட்ரென்ட் போல்ட்ற், இஷ் சோதி ஆகியோர் தலா ஒரு விக்கெட்டைக் கைப்பற்றினர்.
இப்போட்டியில் முதலில் துடுப்பெடுத்தாடப் பணிக்கப்பட்ட நியூசிலாந்து அணி 9 விக்கெட்டுக்களை இழந்து 609 ஓட்டங்களைப் பெற்று தனது இனிங்ஸை இடைநிறுத்தியிருந்தமை குறிப்பிடத்தக்கது.