யூத அரசியல்வாதிகள் அல்-அஸ்காவுக்கு நுழைய தடை விதிப்பு

அல்-அஸ்கா பள்ளிவாசல் பகுதிக்குள் நுழைய இஸ்ரேலிய அரசாங்க அமைச்சர்கள் மற்றும் இஸ்ரேலிய நாடாளுமன்ற உறுப்பினர்களை தடுக்குமாறு இஸ்ரேலியப் பிரதமர் பெஞ்சமின் நெதன்யாகு இஸ்ரேலிய பொலிஸாருக்கு உத்தரவிட்டுள்ளார்.

கடந்த சில வாரங்களாக இஸ்ரேலியர்களுக்கும், பலஸ்தீனர்களுக்கும் இடையே ஏற்பட்ட பதற்றத்தைத் தொடர்ந்து, முஸ்லிம்களாலும், யூதர்களாலும் தமது புனித பகுதியென உரிமை கொண்டாடிவரும் ஜெருசசேலம் பகுதியில் மோதல்கள் ஏற்பட்டிருந்தன.

கடந்த வார இடம்பெற்ற பாதுகாப்பு ஆலோசனையின்போதே தனது உத்தரவை பிரதமர் பிறப்பித்ததாகவும், எனினும் உத்தியோகபூர்வமாக அமைச்சரவை அமைச்சர்களுக்கு தனது உத்தரவை அவர் அறிவிக்கவில்லையெனவும் அதிகாரியொருவர் தெரிவித்துள்ளார்.

எனினும் முஸ்லிம், நாடாளுமன்ற உறுப்பினர்களுக்கு இப்போதும் பள்ளிவாசலுக்கு செல்ல அனுமதியளிக்கப்பட்டுள்ளது.

விவசாய அமைச்சர் யூரி ஏரியல் உட்பட, கடந்த வாரங்களில் அல்-அஸ்கா பகுதிக்கு விஜயம் செய்திருந்த சில யூத அரசியல்வாதிகள், யூதர்கள் அங்கு வழிபாடு செய்ய அனுமதியளிக்கப்பட வேண்டும் என்ற கோரிக்கைக்கு ஆதரவாக தமது கருத்துக்களை வெளிப்படுத்தியிருந்தனர்.

தற்போது யூதர்களும், முஸ்லிம் அல்லாதவர்களும் அங்கு செல்ல அனுமதிக்கப்படுகின்ற போதும், அங்கு வழிபாடு செய்ய தடை விதிக்கப்பட்டுள்ளது.