குழாயிலிருந்து கசியும் எண்ணெய் 20லீற்றர் ரூபா 600 வீதம் விற்பனை

(உதய கார்த்திக்)
கொழும்பு புளூமெண்டல் பகுதியினூடாக செல்லும் எண்ணெய் குழாய் ஒன்றில் ஏற்பட்டுள்ள கசிவினால், கிரான்ட்பாஸ் ஜயந்தமல்லிமாராச்சி வீதியையொட்டி காணப்படும் கால்வாய் வழியாக மசகு எண்ணெய் வெளியேறுகிறது.

கடந்த இரண்டு தினங்களுக்கு மேலாக குழாயிலிருந்து எண்ணெய் கசிவதால் கால்வாயின் மேற்பரப்பில் 4அங்குலத்துக்கு மசகு எண்ணெய் தேங்கி நிற்பதுடன் கால்வாய் மஞ்சள் நிறத்தில் காட்சியளிக்கிறது.

இதனால் அப்பகுதிமக்கள் குறித்த கால்வாய் வழியாக வெளியேறும் மசகு எண்ணையை மரப்பலகையால் அணையிட்டு, தேக்கி வைத்து, அதனை சட்டவிரோதமாக சேகரித்து வருகின்றனர்.

குறித்த எண்ணைக்கு அதிக கேள்வி இருப்பதனால் இந்த எண்ணையை 20 லீற்றர் 600ரூபா என்ற விலையில் சில தரகர்கள் வாங்க வருவதாக அப்பகுதி மக்கள் தெரிவிக்கின்றனர்.

இது தொடர்பில் நாம் பெற்றோலிய வளத்துறை அமைச்சர் சுசில் பிரேமஜெயந்தவிடம் வினவிய போது 'குறித்த எண்ணெய் குழாய் அரசாங்கத்தினது அல்ல: தனியாருக்குரியது. அத்துடன் அதில் வெளியேறுவது எண்ணெய் கழிவுகளே' என கருத்து தெரிவித்திருந்தார்.