கிழக்கு மாகாண ஆசிரியர்களின் சுகயீன போராட்டம் ரத்து

(அமதோரு அமரஜீவ,எஸ்.எஸ்.குமார்)

சர்ச்சைக்குரிய கிழக்கு மாகாண ஆசிரியர் இடமாற்றம் தற்காலிகமாக இடைநிறுத்தம் செய்யப்பட்டுள்ளதை அடுத்து நாளை மறுதினம் வியாழக்கிழமை நடத்துவதற்கு ஏற்பாடாகியிருந்த கிழக்கு மாகாண ஆசிரியர்களின் சுகயீனப் போராட்டம் ரத்து செய்யப்பட்டுள்ளது.

ஜனாதிபதி மஹிந்த ராஜபக்ஷவின் உத்தரவுக்கமைய இந்த இடமாற்றங்கள் எதிர்வரும் டிசம்பர் மாதம் வரையில் ஒத்திவைக்கப்பட்டுள்ள நிலையிலேயே இந்த போராட்டத்தை ரத்து செய்ய அனைத்து ஆசிரியர் சங்கங்களும் இணைந்து தீர்மானித்ததாக இலங்கை ஆசிரியர் சங்கத்தின் பொதுச் செயலாளர் ஜோசப் ஸ்ராலின் தெரிவித்தார்.

இது தொடர்பில் மேலும் கருத்து தெரிவித்த அவர், 'தேசிய ஆசிரியர் இடமாற்றக் கொள்கையை பூரணமாக அலட்சியம் செய்யும் வகையிலும்  வருடத்தின் நடுப்பகுதியில் இந்த இடமாற்றங்கள் மேற்கொள்ளப்பட்டுள்ளதால் பாடசாலைகளின் இயல்பான தொழிற்பாடுகளும் மாணவர்களின் கல்வியும் மிக மோசமாக பாதிக்கப்பட்டுள்ளமையையும் சுட்டிக்காட்டி குறித்த இடமாற்றங்களை நிறுத்துவது தொடர்பில் கிழக்கு மாகாண ஆளுநருடன் பேச்சுவார்த்தை நடத்தப்பட்டது.

இந்த பேச்சுவார்த்தை தோல்வியில் முடிவடைந்த நிலையிலேயே மேற்படி போராட்டத்தை நடத்த ஆசிரியர் சங்கங்கள் இணைந்து தீர்மானித்தன. இருப்பினும் ஜனாதிபதியின் உத்தரவுக்கு அமைய இந்த இடமாற்றம் இடைநிறுத்தப்பட்டுள்ளது. இதனால் எமது தீர்மானத்திலும் மாற்றத்தை ஏற்படுத்தினோம்.

இருப்பினும்,  இனிவரும் காலங்களிலும் ஆசிரியர் இடமாற்றக் கொள்கையை மீறி நடவடிக்கைகள் எடுக்கப்படும் பட்சத்தில் அனைத்து ஆசிரியர் சங்கங்களும் இணைந்து போராட்டங்களை நடத்தும்' என்று அவர் மேலும் குறிப்பிட்டார்.