டயமண்ட் லீக் 2016இன் 100 மீற்றரில் ஜஸ்டின் கட்லின் வெற்றி

ஐக்கிய அமெரிக்காவின் ஒரிகனில் இடம்பெற்ற டயமண்ட் லீக்கின் 100 மீற்றர் ஓட்டப் போட்டியில், இவ்வருடத்தின் தனது சிறந்த நேரமான 9.88 செக்கன்களில் ஓடிய ஜஸ்டின் கட்லின் வெற்றி பெற்றார்.

இப்போட்டியில், 9.94 செக்கன்களில் ஓடிய ஜமைக்காவின் அஸாவா பவல், 9.98 செக்கன்களில் ஓடிய சக அமெரிக்க வீரரான டைஸன் கே ஆகியோரை முந்தியே இப்பந்தயத்தை கட்லின் வென்றிருந்தார். இதேவேளை, இவ்வருடத்தின் அதிவேகமான வீரரான, கட்டாருக்காக போட்டிகளைப் பங்கேற்கும் பெமி ஒகுநொடே, 10.02 செக்கன்களில் ஓடி ஐந்தாவது இடத்தைப் பெற்றிருந்தார்.

34 வயதான முன்னாள் ஒலிம்பிக் சம்பியனான கட்லின், இம்மாத ஆரம்பத்தில் ஷங்காயில் நடைபெற்ற டயமண்ட் லீக் போட்டியிலும் வெற்றி பெற்றிருந்த நிலையில் டயமண்ட் லீக்கின் 100 மீற்றர் தரவரிசையில் முன்னிலையில் உள்ளார்.