இன, மத அடிப்படையில் பாடசாலைகள் உருவாக்கப்பட்டமை பெரும் தவறாகும் : உயர்கல்வி அமைச்சர் எஸ்.பி.

(எம்.எம்.எம். ரம்ஸீன்) 

இன மற்றும் மத அடிப்படையில் பாடசாலைகள் உருவாக்கப்பட்டமை பெரும்  தவறாகும் என உயர்கல்வி அமைச்சர் எஸ்.பி. திசாநாயக்க கூறியுள்ளார்.

கண்டி, கெலிஓயா அஸ்ஸிராஜ் ஆண்கள் பாடசாலையில் இன்று ஞாயிற்றுக்கிழமை  நடைபெற்ற வருடாந்த பரிசளிப்பு விழாவில் பிரதம அதிதியாகக் கலந்து கொண்டு உரையாற்றுகையிலேயே அவர்  இவ்வாறு கூறினார்.

இது தொடர்பாக அவர் மேலும் கூறுகையில்,  'கடந்த காலங்களில் இன மற்றும் மத அடிப்படைகளில் பாடசாலைகள் உருவாக்கப்பட்டமை பெரும்  தவறாகும். இதனால் மாணவர்கள் மத்தியில் பல் கலாசாரங்களைப் புரிந்து கொள்ளவும் மதிக்கவும் கூடிய பண்பு அருகியுள்ளது.
  
சகல இன மாணவர்களும் ஒரே பாடசாலையில் கற்கக்கூடிய  நடவடிக்கைகளை  மேற்கொள்ள வேண்டும். இதன் அடிப்படையில் தமிழ் பாடசாலைகளில் சிங்கள மொழிப்பிரிவும் சிங்கள மொழி பாடசாலைகளில் தமிழ் மொழிப் பிரிவும் ஏற்படுத்தப்படுவது பொருத்தமாக அமையும்' என்றார்.

பாடசாலை அதிபர் பஸ்லி சுலைமான் தலைமையில் நடைபெற்ற இவ்விழாவில் அமைச்சர் எஸ்.பி.திசாநாயக்க மேலும் உரையாற்றுகையில்,

'தற்காலத்தை ஆட்சி செய்வது அறிவாகும். செல்வத்தையும் ஆட்சி செய்யும் ஆற்றலை அறிவு கொண்டுள்ளது. எனவே அறிவின்பால் மாணவர் சமூகம் அக்கறை கொள்ள வேண்டும்.

தற்காலத்தில் பெண்கல்வி உயர்நிலையிலுள்ளது. நமது நாட்டில் பெண்களின் உயர்கல்விப் பிரவேசம் 70 சதவீதமாக உள்ளது.

கல்வித் துறையில் நிலவும் பிரச்சினைகளைத் தீர்க்கவும் பாடசாலைகளில் மாணவர் அனுமதி தொடர்பில் நிலவும் பிரச்சினைகளைத் தீர்க்கவும் கல்வி தொடர்பான சட்டங்களில் திருத்தங்களைக் கொண்டு வர வேண்டியது அவசியமாகும்' என்றார்.

இதில் மத்திய மாகாண சபை உறுப்பினர்களான எஸ்.எஸ். எம். மர்ஜான், மானெல் பண்டார, தெனுவர வலயக் கல்விப் பணிப்பாளர் வீரரட்ன, உதவிக் கல்விப் பணிப்பாளர் சீ. எம். மன்சூர் உட்பட பலரும் கலந்து கொண்டனர்.