இந்தோனேஷியா மேற்கு ஜாவாவில் நிலச்சரிவுகளில் 11 பேர் பலி

மேற்கு இந்தோனேஷியாவில் கடும் மழையால் ஏற்பட்ட நிலச்சரிவுகளால் 11 பேர் கொல்லப்பட்டதுடன், 18 பேர் காயமடைந்ததாக அந்நாட்டின் இடர் முகாமைத்துவத்துக்கான தேசிய அதிகாரசபை இன்று தெரிவித்துள்ளது.

மேற்கு ஜாவாவிலுள்ள, இந்தோனேஷியத் தலைநகர் ஜகார்த்தாவிலிருந்து 150 கிலோ மீற்றர் தென்கிழக்காகவுள்ள சிஹன்ஜுவாங்க் கிராமத்தில் நேற்று இலங்கை நேரப்படி பிற்பகல் 2.30 மணிக்கும், ஆறு மணிக்கும் நிலச்சரிவுகள் ஏற்பட்டதாக குறித்த அதிகாரசபையின் பேச்சாளர் றாடிட்யா ஜடி அறிக்கையொன்றில் தெரிவித்துள்ளார்.

கடும் மழைவீழ்ச்சி, நிலையில்லான மண் நிலைமைகளால் முதலாவது நிலச்சரிவு ஏற்பட்டதாகவும், பாதிக்கப்பட்டவர்களை வெளியேற்றும்போது இரண்டாவது நிலச்சரிவு ஏற்பட்டதாக றாடிட்யா ஜடி மேலும் கூறியுள்ளார்.