’இம்மாதம் பிரெக்சிற் இல்லாவிட்டால் தேர்தலை ஆதரிக்கவுள்ள தொழிலாளர் கட்சி’

ஐரோப்பிய ஒன்றியத்திலிருந்து பிரித்தானியாவை இம்மாத இறுதிக்குள் வெளியேற்றும் தனது உறுதிமொழியை பிரித்தானியப் பிரதமர் பொரிஸ் ஜோன்சன் நிறைவேற்றாவிட்டால், அடுத்த மாதம் 26ஆம் திகதி பொதுத் தேர்தலொன்றை பிரித்தானியாவின் பிரதான எதிர்க்கட்சியான தொழிலாளர் கட்சி ஆதரிக்கவுள்ளது என சண் பத்திரிகை நேற்று  செய்தி வெளியிட்டுள்ளது.

நாடாளுமன்றத்தைக் கலைத்து, தேர்தலொன்றுக்குச் செல்வதற்கான வாக்களிப்பொன்றை பிரதமர் பொரிஸ் ஜோன்சன் இம்மாதம் 21ஆம் திகதி முன்மொழிந்தால் நாடாளுமன்றத்தைக் கலைத்து தேர்தலொன்றுக்குச் செல்ல தொழிலாளர் கட்சி இணங்கும் என சண் பத்திரிகை தெரிவித்துள்ளது.

ஐரோப்பிய ஒன்றியத்திலிருந்து பிரித்தானியா வெளியேறுவதற்கான பேச்சுவார்த்தைகள் முறிவடைந்தால் ஐரோப்பிய ஒன்றியத்திலிருந்து பிரித்தானியா வெளியேறுவது தாமதாக்கப்படுகையில் இம்மாதம் 21ஆம் திகதியே பிரித்தானிய நாடாளுமன்றம் கூடுவதற்கான வாய்ப்புக் காணப்படுகின்றது.

நிரந்தர கால நாடாளுமன்றச் சட்டத்தின்படி நாடாளுமன்றம் கலைக்கப்பட்டு 25 முழு வேலை நாட்களுக்குள் தேர்தலொன்று நடைபெறும் என்பது குறிப்பிடத்தக்கது.