இலங்கைக்கு அதிர்ச்சி; தொடரை வென்றது சிம்பாப்வே

இலங்கை, சிம்பாப்வே அணிகளுக்கிடையிலான 5 போட்டிகள் கொண்ட ஒருநாள் சர்வதேசப் போட்டித் தொடரை, சிம்பாப்வே அணி கைப்பற்றியுள்ளது. தீர்மானமிக்க 5ஆவது போட்டி நேற்று இடம்பெற்ற போது, இலங்கை அணியை அதிர்ச்சிகரமாகத் தோற்கடித்த சிம்பாப்வே, தொடரைக் கைப்பற்றியது.

ஏற்கெனவே 2-2 என தொடர் நிலைமை காணப்பட்ட நிலையில், முக்கியமான இந்தப் போட்டியின் நாணயச் சுழற்சியை, சிம்பாப்வே அணியின் தலைவர் கிறேம் கிறீமர் வென்றார். கடந்த 8 போட்டிகளாக, நாணயச் சுழற்சியில் தோல்வியடைந்த அவர், முக்கியமான இந்தப் போட்டியில் வெற்றிபெற்றார்.

முதலில் துடுப்பெடுத்தாடப் பணிக்கப்பட்ட இலங்கை, ஆரம்பத்தில் 3 விக்கெட்டுகளை இழந்து 31 ஓட்டங்களுடன் தடுமாறிய போதிலும், பின்னர் 3 விக்கெட்டுகளை இழந்து 78 ஓட்டங்களுடனும், பின்னர் 4 விக்கெட்டுகளை இழந்து 119 ஓட்டங்களுடனும் ஓரளவு பலமாகக் காணப்பட்டது. ஆனால் பின்னர் விக்கெட்டுகளைத் தொடர்ச்சியாக இழந்து, 8 விக்கெட்டுகளை இழந்து 153 ஓட்டங்கள் என்ற நிலைக்குச் சென்றது. 9ஆவது விக்கெட்டுக்காக, பிரிக்கப்படாத 50 ஓட்டங்கள் பகிரப்பட்டன.

பதிலளித்தாடிய சிம்பாப்வே அணி, முதலாவது விக்கெட்டுக்காக 92 ஓட்டங்களை அதிரடியாகப் பகிர்ந்தது. பின்னர், ஒரு கட்டத்தில் ஒரு விக்கெட்டை இழந்து 137 ஓட்டங்களுடன் காணப்பட்ட போதிலும், பின்னர் 7 விக்கெட்டுகளை இழந்து 175 ஓட்டங்களுடன் தடுமாறியது. ஆனால் 8ஆவது விக்கெட்டுக்காக, பிரிக்கப்படாத 29 ஓட்டங்கள் பகிரப்பட்டு, வெற்றி பெறப்பட்டது.

சிம்பாப்வேயின் இந்தத் தொடர் வெற்றி, இலங்கைக்கெதிராக அந்நாடு பெறும் முதலாவது தொடர் வெற்றியாகும். அத்தோடு, டெஸ்ட் விளையாடும் நாடுகளில் பங்களாதேஷ் தவிர்ந்த ஏனைய நாடுகளுககு எதிராக, அந்நாடு பெற்ற 2ஆவது தொடர் வெற்றியாகும். அத்தோடு, தமது நாட்டுக்கு வெளியே, அந்நாடு கடந்த 8 ஆண்டுகளில் கைப்பற்றும் முதலாவது தொடர் வெற்றி இதுவாகும்.

இந்தத் தொடரில், 5 போட்டிகளிலும், இரண்டாவதாகத் துடுப்பெடுத்தாடிய அணியே வெற்றிபெற்றமை குறிப்பிடத்தக்கது.

ஸ்கோர் விவரம்...

நாணயச் சுழற்சி: சிம்பாப்வே

இலங்கை: 203/8 (50 ஓவ.) (துடுப்பாட்டம்: அசேல குணரட்ன 59 (81), தனுஷ்க குணதிலக 52 (86) ஓட்டங்கள். பந்துவீச்சு: சீகன்டர் ராஸா 3/21, கிறேம் கிறீமர் 2/23)

மே.தீவுகள்: 204/7 (38.1 ஓவ.) (துடுப்பாட்டம்: ஹமில்ட்டன் மஸகட்ஸா 73 (86), சொலமன் மையர் 43 (32), தரிசாய் முசகன்டா 37 (49), சீகன்டர் ராஸா ஆ.இ 27 (27) ஓட்டங்கள். பந்துவீச்சு: அகில தனஞ்சய 4/47, லசித் மலிங்க 2/44)

தொடர் முடிவு: சிம்பாப்வே 3-2

போட்டியின் நாயகன்: சீகன்டர் ராஸா

தொடரின் நாயகன்: ஹமில்டன் மஸகட்ஸா