2,100 கிலோகிராம் கழிவுத் தேயிலையுடன் ஒருவர் கைது

எஸ்.சதிஸ்

பூண்டுலோயா பிரதேசத்தில் வைத்து கழிவுத் தேயிலையுடன் ஒருவரை, நேற்று (23) கைதுசெய்துள்ள தலவாக்கலை விசேட அதிரடிப்படையினர், 2,100 கிலோகிராம் கழிவுத் தேயிலையையும் கைப்பற்றியுள்ளனர்.

மேலும், கழிவுத் தேயிலையைக் கொண்டு செல்வதற்காகப் பயன்படுத்திய லொறியையும், அதிரடிப்படையினர் கைப்பற்றியுள்ளனர்.

கம்பளையில் இருந்து பூண்டுலோயா பகுதியிலுள்ள தேயிலைத் தொழிற்சாலைக்கு தேயிலைத்தூளைக் கொண்டு சென்ற லொறியை, இடையில் வழிமறித்துச் சோதனை செய்தபோது, கழிவுத் தேயிலை கைப்பற்றப்பட்டுள்ளது.

அனுமதிப்பத்திரமின்றி தேயிலைத் தூள் கொண்டு செல்லப்பட்டதெனவும், பொதிசெய்யப்பட்டிருந்த நிலையிலேயே, கழிவுத் தேயிலைக் கைப்பற்றப்பட்டதெனவும், விசேட அதிரடிப்படையினர் தெரிவித்துள்ளனர்.

பூண்டுலோயா பொலிஸில் சந்தேகநபர் ஒப்படைக்கப்பட்டுள்ளதுடன், இது தொடர்பில் மேலதிக விசாரணைகளை பொலிஸார் மேற்கொண்டு வருகின்றனர்.