காசோலை மோசடியில் ஈடுபட்டவர் கைது

-எஸ்.ஜமால்டீன்

காசோலை மோசடியில் ஈடுபட்டதாகக் கூறப்படும் இளைஞர் ஒருவரை அம்பாறை, அக்கரைப்பற்றுப் பிரதேசத்தில் திங்கட்கிழமை (23) இரவு பொலிஸார் கைதுசெய்துள்ளனர்.

அக்கரைப்பற்று பிரதேசத்தைச் சேர்ந்த விற்பனை முகவர் ஒருவரிடமிருந்து நான்கு இலட்சத்து 92 ஆயிரம் ரூபாய் பெறுமதியான மின் உபகரணங்கள் உள்ளிட்ட பொருட்களை கடந்த ஜனவரி மாதம் கொள்வனவு செய்த இந்தச் சந்தேக நபர், அப்பணத்துக்குப் பதிலாக கணக்கு மூடிய காசோலைகளை வழங்கியுள்ளார்.

இந்தக் காசோலைகளைப் பெற்றுக்கொண்ட முகவர் அக்காசோலைகளை மாற்றுவதற்காக குறித்த வங்கிகளுக்குச் சென்றபோது, அங்கு இக்காசோலைகள் செல்லுபடி அற்றது எனத் தெரிவிக்கப்பட்டுள்ளது. இதனை அடுத்து, கடந்த மார்ச் மாதம் 12ஆம் திகதி அக்கரைப்பற்று பொலிஸில் குறித்த விற்பனை முகவர் முறைப்பாடு செய்துள்ளார்.

இது தொடர்பில் விசாரணை மேற்கொண்டுவந்த தாம் 35 வயதுடைய இச்சந்தேக நபரைக் கைதுசெய்துள்ளதாக பொலிஸார் தெரிவித்தனர்.