44 வைத்தியசாலைகளுக்கு உபகரணங்களும் தளபாடங்களும் வழங்க ஏற்பாடு

-பைஷல் இஸ்மாயில்

அம்பாறை, கல்முனை பிராந்திய சுகாதார சேவைகள் பணிமனையின் கீழியங்கும் 44 வைத்தியசாலைகளுக்கு வைத்திய உபகரணங்களும் தளபாடங்களும் நாளை வியாழக்கிழமை வழங்கப்படவுள்ளன.

கல்முனை பிராந்திய சுகாதார சேவைகள் பணிமனைக் காரியாலயத்தின் கீழியங்கும் தள வைத்தியசாலைகள் -03 மாவட்ட வைத்தியசாலைகள் -11, ஆரம்ப பராமரிப்பு பிரிவு வைத்தியசாலைகள் -12, விசேட வைத்திய சேவைப் பிரிவுகள் -05, சுகாதார வைத்திய அதிகாரி காரியாலயங்கள் -13 ஆகியவற்றுக்கே தளபாடங்களும் வைத்திய உபகரணங்களும் வழங்கப்படவுள்ளன.
கிழக்கு மாகாண சுகாதார அமைச்சர் ஏ.எல்.எம்.நஸீரின் நிதியொதுக்கீட்டின் கீழ், 06 கோடி ரூபாய் செலவில் இவை வழங்கப்படவுள்ளன.

இவை வழங்கும் நடவடிக்கை, கல்முனை பிராந்திய சுகாதார சேவைகள் பணிமனையின் காரியாலயக் கேட்போர் கூடத்தில் நடைபெறவுள்ளது. இவற்றைப் பெற்றுக்கொள்வதற்காக 44 வைத்தியசாலைகளின் வைத்திய பொறுப்பதிகாரிகளும் அழைக்கப்பட்டுள்ளதாக கல்முனை பிராந்திய சுகாதார சேவைகள் பணிப்பாளர், வைத்தியர் ஏ.எல்.அலாவுதீன் தெரிவித்தார்.