அட்டாளைச்சேனை பிரதேச சபையின் வரவு செலவுத் திட்டம் ஏகமனதாக நிறைவேற்றம்

(ஹனீக் அஹமட்)

அட்டாளைச்சேனை பிரதேச சபையின் 2012 ஆம் ஆண்டுக்கான வரவு  செலவுத் திட்டம், எதிர்க்கட்சி உறுப்பினர்களின் ஆதரவுடன் ஏகமனதாக நிறைவேற்றப்பட்டது.

அட்டாளைச்சேன பிரதேச சபையின் அமர்வு நேற்று வியாழக்கிழமை தவிசாளர் ஏ.எல்.எம். நசீர் தலைமையில் பிரதேச சபைக் கூட்ட மண்டபத்தில் இடம்பெற்றது.

இதன்போது 2012 ஆம் ஆண்டுக்கான வரவு  செலவுத் திட்டத்தை தவிசாளர் நசீர் சபையில் சமர்ப்பித்து உரையாற்றினார்.

இதனையடுத்து உப தவிசாளர் மற்றும் உறுப்பினர்கள், சமர்ப்பிக்கப்பட்ட வரவு  செலவுத் திட்டம் தொடர்பான தமது கருத்துக்களைத் தெரிவித்தனர்.

இதன் பின்னர் எதிர்க்கட்சியைச் சேர்ந்த இரண்டு உறுப்பினர்கள் உள்ளடங்கலாக அனைத்து உறுப்பினர்களும் வரவு  செலவுத் திட்டத்துக்கு ஆதரவாக வாக்களித்தனர்.

மேற்படி வரவு  செலவுத் திட்டத்தின்படி, 2012 ஆம் ஆண்டு அட்டாளைச்சேனைப் பிரதேச சபைக்கான வருமானமாக சுமார் 07 கோடியே 36 லட்சம் ரூபாய் எதிர்பார்க்கப்படுகிறது.

தவிசாளர் உட்பட 9 உறுப்பினர்களைக் கொண்ட மேற்படி பிரதேச சபையில், முஸ்லிம் காங்கிரசைப் பிரதிநிதித்துவப்படுத்தி 7 உறுப்பினர்களும், வெற்றிலைச் சின்னத்தில் தேசிய காங்கிரசைப் பிரதிநிதித்துவப்படுத்தி 2 உறுப்பினர்களும் உள்ளனர்.