கொண்டவட்டுவானில் விவசாயிகள் மீது இனந்தெரியாதோர் தாக்குதல்; நால்வர் காயம்

(எம்.சி.அன்சார்)

அம்பாறை பொலிஸ் பிரிவுக்குட்பட்ட கொண்டவட்டுவான் பிரதேசத்தில் யானைக் காவலில் ஈடுபட்டிருந்த நான்கு விவசாயிகள் மீது இனம்தெரியாத குழுவினரினால் மேற்கொண்ட தாக்குதலில் மேற்படி நால்வரும் படுகாயமடைந்த நிலையில் அம்பாறை பொதுவைத்தியசாலையில் அனுமதிக்கப்பட்டுள்ளனர்.

நேற்றிரவு 9 மணியளவில் இடம்பெற்ற இச்சம்பவம் பற்றி மேலும் தெரியவருவதாவது, 'குறித்த விவசாயிகள் கொண்டவட்டுவான் பள்ளிவாசலுக்கு அருகில் தமது வேளாண்மையை யானைகளிடமிருந்து பாதுகாப்பதற்காக காவலில் இருந்துள்ளனர்.

அவ்வழியாக ஜீப் வண்டியில் வந்த இனந்தெரியாத குழுவினர்கள் நீங்கள் எந்த இனத்தினைச் சேர்ந்தவர்கள் எனக் கோட்டபோது நாங்கள் முஸ்லிம்கள் எனக் கூறியதும் குழுவினர் சரமாரியாக தாக்கிவிட்டு தப்பிச் சென்றனர்.

இது தொடர்பில் அம்பாறை பொலிஸாருக்கு அறிவிக்கப்பட்டதை அடுத்து அங்கு விரைந்த பொலிஸார் தேடுதல் நடத்தியதுடன், படுகாயமடைந்தவர்களை அம்பாறை பொது வைத்தியசாலையில் சிகிச்சைக்காக கொண்டு செல்லப்பட்டனர். மேலதிக விசாரணைகளை அம்பாறை பொலிஸார் மேற்கொண்டு வருகின்றனர்