மர்ம மனிதனின் தாக்குதலுக்குள்ளான பெண்ணின் வாக்குமூலம்

(எஸ்.எம்.எம்.றம்ஸான்)

நேற்றுமுன்தினம் திங்கட்கிழமை இரவு 10.30 மணியளவில் வீட்டிலிருந்து நான் வெளியே வந்தபோது திடீரென என் முன்னால் தோன்றிய மர்ம மனிதன் எனது கையில் கீறிய நிலையில் கூச்சலிட்டுக் கத்தினேன்  இவ்வாறு கல்முனையில் மர்ம மனிதனின் தாக்குதலுக்குள்ளான நூரூல் றிஸ்வானா (வயது 19) என்ற பெண் தனக்கு நடந்த சம்பவத்தை விபரித்தார்.

நூரூல் றிஸ்வானா கல்முனை பள்ளிவீதியில் தனது குடும்பத்தவர்களுடன் வசித்து வருகிறார்.

அவர் மேலும் தெரிவிக்கையில்,

'இரவு வேளைகளில் நாங்கள் குடும்பத்தோடு சந்தோசமாக கதைவிட்டு உறங்கச் செல்வது வழமை.  அன்றையதினமும் அவ்வாறே உறங்கச் செல்வதற்கு முன்னர் நான் வெளியே வந்தேன்.  அவ்வேளையில் திடீரென என் முன்னால் தோன்றிய மர்ம மனிதன் எனது கையில் கீறிய நிலையில்  நான் சத்தமிட்டுக் கத்தினேன். அப்போது வீட்டிலிருந்தவர்கள் வெளியே ஓடி வர அம்மர்மனிதன் ஓடி விட்டான்.

அம்மர்ம மனிதனின் முகம் கறுப்பாக இருந்ததுடன் கண் மட்டுமே தெளிவாக விளங்கியது. அவன் அணிந்திருந்த ஆடையும் கறுப்பாக இருந்தது.  கூச்சல் சத்தத்தைக் கேட்டு அவ்விடத்திற்கு வந்த அயலவர்கள் அம்மர்ம மனிதனை தேடியபோதும் அவன் அகப்படவில்லை' என்றார்.

மர்ம மனிதனின் தாக்குதலுக்குள்ளான இப்பெண்  தற்போது கல்முனை அஷ்ரப் ஞாபகார்த்த  வைத்தியசாலையில் சிகிச்சை பெற்று வருகிறார்.

இது தொடர்பாக அவ்வைத்தியசாலையின் வைத்தியர் ஒருவரிடம் தெரிவிக்கையில்,

'இது மர்மமாக உள்ளது. நம்பவும் முடியவில்லை. நம்பாமலும் இருக்க முடியவில்லை. என்ன மர்மம்  என்று புரியவில்லை. எங்களது  வைத்தியசாலையில் ஐந்து பேர் மர்ம மனிதனின் தாக்குதலுக்குள்ளான நிலையில் சிகிச்சைக்காக அனுமதிக்கப்பட்டுள்ளனர்' என்றார்.