சமூகப் பிரச்சினைகளை வலியுறுத்தி கல்முனையில் திறந்த நாடகம்

(ஹனீக் அஹமட்)

சமூகப் பிரச்சினைகளை இனங்கண்டு, அவற்றினை எவ்வாறு இல்லாதொழிப்பது எனும் கருப்பொருளில் வீதி நாடகத்தினையொத்த திறந்த நாடகமொன்று நேற்று கல்முனை கிறிஸ்டா இல்ல வளாகத்தில் இடம்பெற்றது.

ஊழல்களுக்கு எதிராகச் செயற்பட்டு வரும் இன்ரநெஷனல் ட்ரான்ஸ்பேரன்ஸி ஸ்ரீலங்கா அமைப்பும் கல்முனை தமிழ் பிரிவு பிரதேச செயலகமும் இணைந்து – 'மக்களுக்குக் கைகொடுத்தல்' எனும் தொனிப் பொருளிலான நிகழ்வொன்றினை நேற்று வியாழக்கிழமை நடத்தியது. இதன் ஒரு அங்கமாகவே – மேற்படி நாடகம் இடம்பெற்றது.

இந்நாடகத்தினைக் காண பெருமளவான மக்கள் திரண்டிருந்தனர். இதேவேளை, இந்ந நிகழ்வின் போது பல்வேறு அரச நிறுவனங்களின் நடமாடும் சேவைகளும் இடம்பெற்றன.

மக்களுக்குக் கைகொடுத்தல் எனும் மேற்படி நிகழ்வில் கல்முனை தமிழ் பிரிவு பிரதேச செயலாளர், ட்ரான்ஸ்பேரன்ஸி இன்ரநெஷனல் ஸ்ரீலங்கா அமைப்பின் அதிகாரிகள், கல்முனை பொலிஸ் நிலைய அதிகாரிகள் வருகை தந்திருந்ததோடு, பெருமளவான பொதுமக்களும் இந்நிகழ்வில் கலந்து கொண்டு பயன்பெற்றனர்.