திவிநெகும திட்டத்தின் கீழ் முட்டையிடும் கோழிக் குஞ்சுகள் வழங்கி வைப்பு

(ஏ.ஜே.எம்.ஹனீபா)

திவிநெகும மணைப் பொருளாதார அபிவிருத்தித் திட்டத்தின் கீழ் நாவிதன்வெளி பிரதேச செயலகப் பிரிவுக்குட்பட்ட குடும்பங்களுக்கு ஒரு மாத அளவுடைய முட்டையிடும்  கோழிக் குஞ்சுகள் வழங்கும் நிகழ்வு இன்று நாவிதன்வெளி பிரதேச செயலகத்தில் பிரதேச செயலாளர் கலாநிதி எம்.கோபாலரத்தினம் தலைமையில் நடைபெற்றது.
 
இந்நிகழ்வில் கோழி வளர்ப்புக்காக தெரிவு செய்யப்பட்ட 750 குடும்பங்களிலிருந்து முதல் கட்டமாக 250 குடும்பங்களுக்கு 10 முட்டைக் கோழிக் குஞ்சுகள் வீதம் மொத்தமாக 2500 குஞ்சுகள் வழங்கி வைக்கப்பட்டன.

ஏனைய 500 குடும்பங்களுக்குமான கோழிக்குஞ்சுகள் விரைவில் வழங்கப்படவுள்ளதாக பிரதேச செயலாளர் கலாநிதி எம்.கோபாலரத்தினம் தெரிவித்தார்.

இந்நிகழ்வில் உதவித் திட்டமிடல் பணிப்பாளர்களான திருமதி பாக்கிய ராஜா , கே.எல்.ஏ.ஹமீட், கிராம சேவை நிர்வாக உத்தியோகத்தர் கே.பொன்னம்பலம் உட்பட கிராம உத்தியோகத்தர்கள், சமூர்த்தி உத்தியோகத்தர்கள் பலரும் கலந்து கொண்டனர்.