ஆசிரியர் இடமாற்றத்தை இரத்து செய்யக்கோரி மகஜர் கையளிப்பு

(எஸ்.எம்.எம்.றம்ஸான்)

கிழக்கு மாகாணத்தில் முறையற்ற விதத்தில் இடம்பெறும் ஆசிரியர் இடமாற்றத்தை நிறுத்தக் கோரி  கல்முனை கல்வி வலயத்திற்குட்பட்ட ஆசிரியர்கள் இன்று புதன்கிழமை கல்முனை பொது நூலகத்திற்கு முன்பாக ஆர்பாட்டமொன்றில் ஈடுப்பட்டதுடன் வலயக்கல்விப் பணிப்பாளரிடம் மகஜர் ஒன்றையும் கையளித்துனர்.

இதன்போது, பெண்களின் இடமாற்றத்தை இரத்து செய், எமது குழந்தைகளின் உரிமையை பாதுகாருங்கள், 5 மாத குழந்தையை என்னை விட்டுப் பிரிக்காதே, போன்ற வாசகங்கள் எழுதிய பதாதைகளை தாங்கிய வண்ணம் இவர்கள் ஆர்பாட்டத்தில் ஈடுப்பட்டனர். 

இதேவேளை, மகஜரை பெற்றுக்கொண்ட கல்முனை வலயக்கல்விப் பணிப்பாளர் எம்.ரீ.ஏ.தௌபிக் இவ்விடையத்தை உடனடியாக கிழக்கு மாகாண கல்விப் பணிப்பாளரின் கவனத்திற்கு கொண்ட வருவதாகவும் உறுதியளித்தார்.

இதன்போது, குறித்த இடத்திற்கு விஜயம் செய்த கிழக்கு மாகாண சபை உறுப்பினர் எம்.எல்.துல்கர்நையிமிடமும் மகஜர் கையளிக்கப்பட்டது. இதன்போது மாகாண சபை உறுப்பினர் எம்.எல்.துல்கர்நை தெரிவிக்கையில்,

மேலதிக ஆசிரியர்கள் என்பது கிழக்கு மாகாணத்தில் மட்டுமல்ல ஏனைய மாகாணங்களிலும் உள்ளது. ஆசிரியர் பற்றாக்குறைப் பிரச்சினையை புதிய நியமனத்தின் மூலம் தீர்த்துக் கொள்ளலாம். கடந்த இடமாற்றத்தின் போது விடப்பட்ட அதே தவறுகள் இவ்விடமாற்றத்திலும் நிகழ்ந்துள்ளது. இவ்விடமாற்றத்தில் பெண்கள் அதிலும் கைக் குழந்தைகள் உள்ள ஆசிரியர்கள் அதிகமாக பாதிக்கப்பட்டுள்ளனர்.  இவ்விடமாற்றத்தை எப்படியாவது  ரத்துச் செய்வேன். அதற்குரிய நடவடிக்கைகளை ஏற்கனவே மேற்கொண்டுள்ளோம் என்று தெரிவித்தார்.