பொத்துவில் வைத்தியசாலையில் நிரந்தர விசேட வைத்திய நிபுணர்கள் இன்மையால் பொதுமக்கள் சிரமம்

(ஹனீக் அஹமட்)

பொத்துவில் ஆதார வைத்தியசாலையில் நிரந்தர விசேட வைத்திய நிபுணர்கள் இன்மையால் நோயாளர்கள் கடுஇமான அசௌகரியங்களை முகம்கொள்வதாக பொதுமக்கள் விசனம் தெரிவிக்கின்றனர். இதேவேளை, இவ்வைத்தியசாலையில் சத்திர சிகிச்சைப் பிரிவு நிர்மாணிக்கப்பட்டுள்ள போதும் இதுவரை அப்பிரிவு இயங்கத் தொடங்கவில்லை எனவும் அவர்கள் சுட்டிக் காட்டுகின்றனர்.

இது தொடர்பில் மேலும் தெரிவிக்கப்படுவதாவது, 'பொத்துவில் ஆதார வைத்தியசாலையானது பல்வேறு குறைபாடுகளுடன் இயங்கி வருகின்றது. இங்கு சத்திர சிகிச்சைக்கூடம், சத்திர சிகிச்சைப் பிரிவு, அவசர சிசிச்சைப் பிரிவு போன்றவை நிர்மாணிக்கப்பட்டுள்ள போதும் அவை இதுவரை இயங்கத் தொடங்கவில்லை என்பது பெருங்குறையாகும்.

அதேவேளை, இவ்வைத்தியசாலைக்கென விசேட வைத்திய நிபுணர்கள் எவரும் இதுவரை நியமிக்கப்படவில்லை. இதனால், அக்கரைப்பற்று மற்றும் சம்மாந்துறை ஆகிய வைத்தியசாலைகளிலிருந்து வாரத்துக்கொரு தடைவை மட்டுமே வைத்திய நிபுணர்கள் பொத்துவில்ஆதார வைத்தியசாலைக்கு வந்து செல்கின்றனர். இதனால், நோயாளர்கள் கடும் சிரமத்தினை எதிர்கொள்வதாகக் கூறப்படுகிறது.

மேலும், இவ்வைத்தியசாலையில் பிணவறையொன்று இதுவரை நிர்மாணிக்கப்படவில்லை என்பது பாரியதொரு குறைபாடகும். அதேவேளை, இங்கு சட்ட வைத்திய அதிகாரியொருவர் நியமிக்கப் படாமையால், பிரேத பரிசோதனைகளுக்காக இங்கிருந்து 50, 100 கிலோமீற்றர் தூரமுள்ள அக்கரைப்பற்று, மட்டக்களப்பு மற்றும் அம்பாறை போன்ற இடங்களிலுள்ள வைத்தியசாலைக்கு பிரேதங்களைக் கொண்டு செல்ல வேண்டிய நிலையுள்ளதைச் சுட்டிக் காட்டும் பொதுமக்கள், இது குறித்து தமது கவலைகளையும் தெரிவிக்கின்றனர்.

இந்த நிலையில், பொத்துவில் ஆதார வைத்தியசாலையில் ஆளனிப் பற்றாக்குறை நிலவுவதும் குறிப்பிடத்தக்கது. எனவே, மேற்படி குறைபாடுகளை நிவர்த்தி செய்து பொத்துவில் ஆதார வைத்தியசாலையினை சிறந்த முறையில் செயற்படுத்துவதற்கு உரிய அதிகாரிகளும், அரசியல்வாதிகளும் நடவடிக்கைகளை மேற்கொள்ள வேண்டுமென மக்கள் கோரிக்கை விடுக்கின்றனர்.