பணம் செலுத்தியும் மின்சார இணைப்பு இல்லை; சங்கமன் கிராம மக்கள் விசனம்

(ஹனீக் அஹமட்)

அம்பாறை மாவட்டம் திருக்கோவில் பிரதேச செயலகப் பிரிவுக்குட்பட்ட தாண்டியடி – சங்கமன் கிராமத்தைச் சேர்ந்த பொதுமக்கள் சிலர் - தமது வீடுகளுக்கு மின்சார இணைப்பினைப் பெறுவதற்காக கடந்த மூன்று, நான்கு மாதங்களுக்கு முன்னர் மின்சார சபையின் அக்கரைப்பற்றுக் காரியாலயத்தில் விண்ணப்பங்களைச் சமர்ப்பித்து அதற்கான பணத்தினைச் செலுத்தியுள்ள போதும் அவர்களுக்கான மின்சார இணைப்பு இதுவரை வழங்கப்படவில்லை என விசனம் தெரிவிக்கப்படுகிறது.

இது தொடர்பாக மின்சார சபையின் அக்கரைப்பற்றுக் காரியாலயத்துக்குச் சென்று தமக்கான மின்சார இணைப்பினை வழங்கும் படி – உரிய அதிகாரிகளிடம் பல தடவை தாம் கோரிக்கை விடுத்துள்ள போதும் உரிய பலன் கிடைக்கவில்லை என்றும் சம்பந்தப்பட்ட தரப்பினர் கூறுகின்றனர்.

இது தொடர்பில் தமது வீட்டுக்கு மின்சார இணைப்பினைப் பெறும் பொருட்டு பணம் செலுத்தியுள்ள பெண்ணொருவர் கூறுகையில்ளூ

'மின்சார இணைப்பினைப் பெறுவதற்கான பணத்தினைச் செலுத்துவதற்காக - நகைகளை அடகு வைத்தும், வட்டிக்குப் பணம் பெற்றுமே நான் பணத்தினைத் திரட்டினேன். ஆனால், பணம் செலுத்தி 04 மாதங்களாகி விட்டன. இன்னும் இணைப்புக் கிடைக்கவில்லை. அதேவேளை, இணைப்பைப் பெறுவதற்காக வட்டிக்கும், அடகு வைத்தும் பெற்ற பணத்துக்கான மாதந்த வட்டியை நான் செலுத்த வேண்டியுள்ளது. 

இதேவேளை, மேற்படி சங்கமன் கிராமத்திலிருந்து மின்சார சபையின் அக்கரைப்பற்றுக் காரியாலயம் சுமார் 25 கிலோமீற்றர் தூரத்தில் அமைந்துள்ளது. இக் காரியாலயத்துக்கு அடிக்கடி சென்று வருவதென்பது எமக்கு அலைச்சலையும், மேலதிக பணச் செலவினையும் ஏற்படுத்துகிறது' என்றார்.

தாண்டியடி – சங்கமன் கிராமத்தில் யானைகளின் அச்சுறுத்தல் உள்ள நிலையில், இங்குள்ள மக்கள் இரவு வேளைகளில் மின்சார வெளிச்சமின்றி இருப்பது மிகவும் ஆபத்தானதானது எனத் தெரிவிக்கும் பொதுமக்கள், தமக்கான மின்சார இணைப்பினை இனியும் காலம் தாழ்த்தாது, உடனடியாக வழங்குமாறு கோரிக்கை விடுக்கின்றனர்.