கத்திக் குத்துச் சம்பவம் தொடர்பில் மேலும் ஒருவர் கைது

-ஏ.எச்.ஏ.ஹுஸைன்

அம்பாறை, சம்மாந்துறை பொலிஸ் பிரிவுக்குட்பட்ட  மல்வத்தையில் இடம்பெற்ற கத்திக் குத்துச் சம்பவத்துடன் தொடர்புடையதாகக் கருதப்படும் மேலும் ஒருவரை செவ்வாய்க்கிழமை (14) கைதுசெய்ததாக சம்மாந்துறை பொலிஸார் தெரிவித்தனர்.

மல்வத்தை தம்பிநாயகபுர பிரதேசத்தை சேர்ந்த செல்லத்துரை தயாளன் (வயது 24) என்பவரும் அவரது நண்பரும்; சம்மாந்துறை 12ஆம் கொலனி பிரதேசத்தில் மரண வீட்டுக்கு சென்றுவிட்டு, மோட்டார் சைக்கிளில் திங்கட்கிழமை (13) இரவு திரும்பிக்கொண்டிருந்தனர். இதன்போது இவர்கள் இருவரும் மோட்டார் சைக்கிளின் ஒளியை செலுத்திப் பார்த்தபோது,  வீதியோரத்தில் இளைஞர்கள் சிலர் மதுபானம் அருந்திக்கொண்டிருந்தனர். இந்த நிலையில், மேற்படி இருவருக்கும் இளைஞர் குழுவுக்குமிடையில் ஏற்பட்ட கைகலப்பில் செல்லத்துரை தயாளன் கத்திக் குத்துக்கு உள்ளாகி மரணமடைந்திருந்தார்.

இதேவேளை, இந்தக் கைகலப்பின்போது கத்திக் குத்தை மேற்கொண்டதாகக் கூறப்படும் நபரும் படுகாயமடைந்திருந்தார். இவர் பொலிஸாரினால் கைதுசெய்யப்பட்டு பொலிஸ் பாதுகாப்பில் அம்பாறை பொது வைத்தியசாலையில் சிகிச்சை பெற்றுவருகின்றார். இந்நிலையிலேயே, மற்றுமொரு சந்தேக நபரும் கைதுசெய்யப்பட்டதாகவும் பொலிஸார் கூறினர்.
இந்தச் சம்பவம் தொடர்பில் பொலிஸார் விசாரணைகளை மேற்கொண்டுள்ளனர்.