சேதப்படுத்தப்பட்ட தந்தை செல்வாவின் உருவச்சிலை சீரமைப்பு

(ரமன்)

தலை சேதமாக்கப்பட்டிருந்த தந்தை செல்வாவின் உருவச்சிலை சீரமைக்கப்பட்டு இன்று பிற்பகல் 3 மணிக்கு திறந்துவைக்கப்படவுள்ளது.

திருகோணமலை சிவன்கோயிலுக்கு அண்மையில் 34 வருடங்களுக்கு முன்னர் பிரதேச இளைஞர்களாலும், தமிழர் விடுதலைக்கூட்டணியின் அனுசரணையுடனும் அமைக்கப்பட்டிருந்த தந்தை செல்வநாயகத்தின் உருவச்சிலையின் தலை இனந்தெரியாதோரால் கடந்த ஞாயிற்றுக்கிழமை அதிகாலை சேதப்படுத்தப்பட்டது.

இந்நிலையில் திருகோணமலை தமிழ் மக்கள் மத்தியிலும் வடக்கு கிழக்கின் தமிழர் பிரதேசங்களிலும் இச்செய்தி பெரும் விசனத்துக்கும் கண்டனத்துக்கும் உள்ளாகியிருந்தது.
 
இதனை அடுத்து திருகோணமலை பொலிஸ் பிரிவின் சிரேஸ்ட பொலிஸ் அத்தியட்சகர் பந்துல விஜயவர்த்தனவின் அவசர உத்தரவிற்கிணங்க திருகோணமலை தலைமைப்பொலிஸ் நிலைய பொறுப்பாதிகாரியின் வேண்டுகோளின்படி திருகோணமலை நகரசபை தலைவர் க.செல்வராஜாவின் நேரடி மேற்பார்வையின் கீழ் சேதப்படுத்தப்பட்ட சிலையின் தலைபகுதி மீளவும் சீரமைக்கபட்டு இன்று பிற்பகல் 3.00 மணிக்கு மக்கள் பார்வைக்காக திறந்து வைக்கப்படவுள்ளது.

சிலை சேதமாக்கப்பட்டமை குறித்து திருகோணமலை பொலிஸ் தரப்பினர் மிகுந்த கவலையும் கண்டனமும் தெரிவித்துள்ள அதேவேளை சிலை சேதமாக்கப்பட்ட செய்தி தெரிந்த நேரத்திலிருந்து சிலை அமைந்துள்ள பகுதியில் பாதுகாப்பிற்கு பொலிஸ் உத்தியோகஸ்தர்கள் கடமையில் ஈடுபடுத்தப்பட்டுள்ளனர்.

இச்சிலை 1983ஆம், 1987ஆம் மற்றும் 1990ஆம் ஆண்டுகளில் வடக்கு கிழக்கிலும் குறிப்பாக திருகோணமலையிலும் இடம்பெற்ற இன வன்முறைகளின் போது பல தடவை சேதமாக்கப்பட்டு 1995ஆம் ஆண்டு மீளவும் சீரமைக்கப்பட்டமை குறிப்பிடத்தக்கது.