பொலிஸ் நிலைய பொறுப்பதிகாரியின் இடமாற்றத்திற்கு எதிராக ஆர்ப்பாட்டம்

காலி மாவட்டத்திலுள்ள ஹபராதுவ பொலிஸ் நிலைய பொறுப்பதிகாரி ஏ.பி. வெலகெதரவை இடமாற்றம் செய்வதற்கு எதிராக ஹபராதுவை நகரில் ஆயிரத்துக்கும் அதிகமானோர் இன்று டயர்களை எரித்து  ஆர்ப்பாட்டத்தில் ஈடுபட்டனர்.

இதனால் காலி – மாத்தறை வீதயில் போக்குவரத்து பாதிக்கப்பட்டது. சட்டவிரோத செயற்பாடுகளுக்கு எதிராக நடவடிக்கை மேற்கொண்டு, குற்றவாளிகளை கைது செய்த நேர்மையான பொலிஸ் அதிகாரியொருவரை அதிகாரிகள் இடம் மாற்றுவதாக ஆர்ப்பாட்டக்காரர்கள் குற்றம் சுமத்தினர்.

மேற்படி பொறுப்பதிகாரி கடமையை பொறுப்பேற்றபின் அப்பகுதியில் குற்றச்செயல்கள் குறைந்துவருவதாக பொதுமக்கள் தெரிவிக்கின்றனர்.  இந்த இடமாற்றத்தின் பின்னணியில் அப்பகுதி அரசியல்வாதியொருவர் இருப்பதாக அவர்கள் கூறினர்.

சம்பந்தப்பட்ட அதிகாரிகளுடன் கலந்துரையாடியபின் மேற்படி இடமாற்றத்தை இரத்துச் செய்வது குறித்து ஆராய்வதாக காலி மாவட்ட பிரதி பொலிஸ் மா அதிபர் ஹெக்டர் தமர்சிறி உறுதியளித்ததையடுத்து ஆர்ப்பாட்டக்காரர்கள் கலைந்து சென்றனர். (டி.ஜி. சுகதபால, சஜீவ விஜேவீர)