செவில்லாவைத் தோற்கடித்தது பார்சிலோனா

ஸ்பானியக் கால்பந்தாட்டக் கழகங்களுக்கிடையிலான லா லிகா தொடரில், தமது மைதானத்தில் இன்று அதிகாலை இடம்பெற்ற செவில்லாவுடனான போட்டியில் அவ்வணியை நடப்புச் சம்பியன்களான பார்சிலோனா தோற்கடித்தது.

இப்போட்டியின் 27ஆவது நிமிடத்தில் தமது முன்களவீரர் லூயிஸ் சுவாரஸ் தலைக்கு மேலால் பெற்ற கோலுடன் முன்னிலை பெற்ற பார்சிலோனா, அடுத்த ஐந்தாவது நிமிடத்தில் தமது மத்தியகளவீரர் ஆர்தர் மெலோவின் கோல் கம்பத்தை நோக்கிய உதையானது இன்னொரு மத்தியகளவீரர் ஆர்துரோ விடாலின் தொடுகையுடன் கோலான நிலையில் தமது முன்னிலையை இரட்டிப்பாக்கியது.

இந்நிலையில், அடுத்த மூன்றாவது நிமிடத்தில் சிறப்பான தனித்த கோலை பார்சிலோனாவின் முன்களவீரரான உஸ்மான் டெம்பிலி பெற்றநிலையில் முதற்பாதி முடிவில் 3-0 என்ற கோல் கணக்கில் பார்சிலோனா முன்னிலை வகித்தது.

பின்னர் போட்டியின் 78ஆவது நிமிடத்தில் பிறீ கிக் மூலம் தமது அணித்தலைவரும் முன்களவீரருமான லியனல் மெஸ்ஸி கோலொன்றைப் பெற்ற நிலையில் இறுதியில் 4-0 என்ற கோல் கணக்கில் பார்சிலோனா வென்றிருந்தது.

இதேவேளை, றியல் வல்லடொலிட்டின் மைதானத்தில் நேற்றிரவு இடம்பெற்ற அவ்வணியுடனான போட்டியை 0-0 என்ற கோல் கணக்கில் சமநிலையில் அத்லெட்டிகோ மட்ரிட் முடித்திருந்தது.

அந்தவகையில், இப்போட்டிகளின் முடிவில் லா லிகா புள்ளிகள் தரவரிசை பின்வருமாறு,

நிலை    அணி                            போட்டிகள்     கோல் வித்தியாசம்    புள்ளிகள்

1. றியல் மட்ரிட்                   8                         8                                        18
2. பார்சிலோனா                 8                         10                                      16
3. அத்லெட்டிகோ மட்ரிட்  8                         3                                        15
4. கிரெனடா                          8                         5                                        14
5. றியல் சொஸைடட்          8                         4                                        13
6. செவில்லா                          8                        -1                                        13
7. அத்லெட்டிக் பில்பாவோ 8                        3                                        12
8. வலென்சியா                       8                        0                                          12