இந்தியா, இங்கிலாந்து இறுதிப் போட்டி இன்று

இந்தியா, இங்கிலாந்து அணிகளுக்கிடையிலான ஐந்தாவதும் இறுதியுமான ஒருநாள் சர்வதேசப் போட்டி இன்று இங்கிலாந்து ஹெடிங்க்லி கிரிக்கெட் மைதானத்தில் நடைபெறவுள்ளது. கடந்த நான்கு போட்டிகளில் மூன்று போட்டிகளில் இந்தியா அணி வெற்றி பெற்றுள்ளதுடன் முதற்ப் போட்டி மழை காரணமாக கைவிடப்பட்டது. தொடர்ச்சியாக தோல்விகளை சந்தித்து வரும் இங்கிலாந்து அணி இந்தப் போட்டியிலாவது ஆறுதல் வெற்றியை பெறுமா என்பது கேள்விக்குறியாகவே உள்ளது. இந்தியா அணி 1990ஆம் இங்கிலாந்தில் நடைபெற்ற தொடரில் விளையாடிய இரண்டு போட்டிகளிலும் வெற்றி பெற்று தொடரைக் கைப்பற்றியது. அதற்கு பிறகு இந்த முறையே அவர்களுக்கு அந்த வாய்ப்பு கிடைத்துள்ளது. எனவே விளையாடிய அனைத்து போட்டிகளிலும் வென்ற சாதனையை நிலை நாட்ட இந்தியா அணி முழு பலத்துடன் இன்று களமிறங்கும் என நம்பப்படுகின்றது. 

 

இன்று நடைபெறவுள்ள இந்தப் போட்டியில் வெற்றி பெற்றால் தரப்படுத்தல்களில் முதலிடத்தை இந்திய அணி தக்க வைத்துக் கொள்ளும். தோல்வியடைந்து, அவுஸ்திரேலியா, தென் ஆபிரிக்கா அணிகளுக்கிடையில் நடைபெறவுள்ள போட்டியில் அவுஸ்திரேலியா அணி வென்றால் அவுஸ்திரேலியா அணி இழந்த முதலிடத்தை மீண்டும் பெற்றுக் கொள்ளும். 

 

இலங்கை நேரப்படி இந்தப் போட்டி இன்று மாலை 3 மணிக்கு ஆரம்பிக்கவுள்ளது.