அரசியல் நிலைமைகள் தொடர்பில் ஆராய்வு

இலங்கைத் தமிழ் அரசுக் கட்சியின் பொதுச் செயலாளருக்கும் ஜனநாயகப் போராளிகள் கட்சியின் மட்டக்களப்பு மாவட்டப் பிரதிநிதிகளுக்குமிடையிலான சந்திப்பு, தமிழ் அரசுக் கட்சியின் மட்டக்களப்பு மாவட்ட அலுவலகத்தில், நேற்று (02)  இடம்பெற்றது.

இதன்போது, மாவட்டத்தின் அரசியல் நிலைமைகள் தொடர்பில் பல்வேறு விடயங்கள் ஆராயப்பட்டன.

அத்துடன், இரு கட்சிகளுக்குமிடையில் இருக்கின்ற இணக்கப்பாடுகள் தொடர்பிலும், எதிர்கால செயற்பாடுகள் தொடர்பிலும் கலந்துரையாடப்பட்டன.

குறிப்பாக மக்களால் எதிர்பார்க்கப்படுகின்ற விடயங்கள் தொடர்பில் கரிசனை கொள்வது, மக்களின் எதிர்பார்ப்புகளை பூர்த்தி செய்வது போன்ற விடயங்கள் இங்கு கலந்துரையாடப்பட்டமை குறிப்பிடத்தக்கது.

இச்சந்திப்பில், இலங்கைத் தமிழ் அரசுக் கட்சியின் பொதுச் செயலாளார் கி.துரைராசசிங்கம், கிழக்கு மாகாண சபை முன்னாள் உறுப்பினர் மா.நடராசா, ஜனநாயகப் போராளிகள் கட்சியின் மட்டக்களப்பு, அம்பாறை இணைப்பாளர் என்.நகுலேஸ், மட்டக்களப்பு, அம்பாறை ஊடகப் பேச்சாளர் பி.சாந்தன், நிர்வாகப் பொறுப்பாளர்  என்.தீபன் ஆகியோர் கலந்துகொண்டனர்.